Dos díes de Conciertu pola Oficialidá

"El Conciertu pola Oficialidá, previstu pa los próximos díes 25 y 26 d'abril, presenta nesta vixésima edición, el cartel de más entidá, con dellos de los grupos más conocíos del panorama musical asturianu, ente los que rescamplen Nuberu, Dixebra, Los Berrones, Llan de Cubel o Tejedor.

L'actu foi presentáu esti martes nuna rueda prensa na que tuvieron presentes Xune Elipe, vocalista de Dixebra, los gaiteros José Manuel Tejedor y Santi Caleya, de los grupos Tejedor y La Bandina, y Tori, vocalista del grupu de hip-hop K-Nalón.

Xune Elipe, impulsor del primer conciertu, fai 20 años n'Avilés, foi el voceru de tolos músicos, espresando'l so contentu porque los organizadores cuntaran col so grupu, y el so pesar porque ""dempués de 20 años tengamos que siguir organizando'l mesmu conciertu pola mesma razón"". ""Dende qu'hai 20 años organizamos el primer conciertu pola Oficialidá n'Avilés con Balandrán, Dixebra y Llan de cubel, cuasi tolos grupos asturianos vienen actuando nesta cita"", lo qu'amuesa ""el compromisu de los músicos asturianos cola oficialidá de la llingua"".

Per primer vegada'l conciertu tará dividíu en dos díes, celebrándose nel recintu de la Feria de Muestres de Xixón. El vienres 25 actuarán Nuberu, Llan de Cubel, Skanda, K-Nalón, Xera, Skama la Rede y Gomeru. Al día siguiente será'l turnu de DRD, La Col.la Propinde, Tejedor, Los Berrones, La Bandina, Dixebra y Chalaneru Sound. El preciu de la entrada pa caún de los díes será d'ocho euros si se merca de manera anticipada y 10 euros nes taquielles. Asina mesmo'l bonu pa les dos xornaes será de 14 euros si se merca anticipadamente y 16 en taquiella.

El restu los músicos agradecieron la convidada de la Xunta pola Defensa de la Llingua de participar nel conciertu, deseando qu'esta fora la última cita d'esti tipu, ""y que'l del añu qu'entra seya'l primeru con oficialidá"" afirmó Santi Caleya. Asina mesmo José Manuel Tejedor recordó que'l grupu ta acabante de recoyer el premiu de la música al meyor cantar n'asturianu, premiu ""onde se reconoz la llingua, cosa que nun se fai equí"". Pa finar, Tori espresó'l so deséu de que ""se cumpla l'artículu de la Constitución española onde se conseña que les llingües del estáu serán oficiales nes sos respeutives comunidaes autónomes"".

El representante de la Xunta pola Defensa de la Llingua Asturiana, Ernesto Avelino, animó a tola xente interesao en participar nesta cita pa la que cuenta tenese una alta participación, basándose n'otres ediciones, nes que llegaron a vendese más de 3.000 entraes, siendo un cartel de menos entidá, d'un solu día y teniendo en cuenta ""qu'esti añu la llingua ye protagonista de la política, por se l'añu de la reforma del Estatutu""."