Llanes va ser otra vegada la capital del folk

"Llanes al cubo" ye la propuesta del conceyu Llanes pal fin de selmana del 31 d'ochobre, propuesta enllena de conciertos y actividaes rellacionaes cola industria musical asturiana.

El conceyu Llanes vien siendo d'unos años p'acá un de los llugares d'Asturies con más actividá rellacionada cola música folk asturiana. Los distintos bandos de Llanes incluyen nes sos fiestes dalgún conciertu folk, y la programación d'esti "Llanes al cubo", entamáu pol Conceyu de Llanes, vien a ser una fiesta final qu'amás sirve de pieslle a la temporada de veranu de conciertos n'Asturies.

El vienres 31 entamen les actividaes con un pregón a les 19:30 del gaiteru José Ángel Hevia, que va tar presente en "Llanes al cubo " de dos maneres, cola so música y cola so fábrica de gaites y otros instrumentos "Hevia Parrado y Aragón", na Feria de Luthiers que va haber a lo llargo de tol fin de selmana. A partir d'esa hora podemos dir a ver teatru, cine y sobre too música. A les 20:30 na Basílica, conciertu del dúu de guitarres "Lafú Y Sturm", que faen lo que dellos definen como como jazz étnico. A les 22:00 hores el primeru de los dos grandes conciertos nocturnos nel escenariu A de "La Bombilla". "Luar na Lubre", "Hevia" y "Corquiéu" son los grupos escoyíos pa esta primer nueche.

El sábadu día 1 yá tenemos actividaes dende pela mañana, con proyecciones, presentaciones de llibros, títeres y otres coses pa entretener la mañana, na que la Banda de Gaites Llacín va dar un conciertu a les 13:30 hores nel escenariu B de "La Bombilla". A les 18:30 y nel mesmo escenariu "La Quintana" de Xixón va dar un conciertu didácticu. Esta actividá, que realicen miembros de la Escuela de Música Tradicional La Quintana de Xixón, consiste nuna charra conciertu onde los músicos van esplicando la historia y la forma tocar de munchos instrumentos asturianos. A les 19:30, nel escenariu B de "La Bombilla", tenemos una cita col gran gaiteru "Fred Morrison". Esti famosu gaiteru escocés que nesta ocasión va actuar solu, yá visito l'añu pasáu Asturies, y demostró qu'en solitario o col so grupu "Ceolas" ye técnicamente ún de los meyores gaiteros del mundu. A les 20:30 na Basílica, l'Andecha Folclor d'Uviéu va presentar l'esperáu "Cancioneru de la Jota Asturiana", amás d'interpretar dalguna de les xotes qu'apaecen nesti trabayu.

Pela nueche, a partir de les 22:15 tenemos el segundu de los conciertos nocturnos, nesta ocasión van ser Kepa Junkera, "Tejedor" y "N'arba" los que van tar nel escenariu A de "La Bombilla". El domingu pela mañana nun paren les actividaes hasta les 14:00 hores que ye cuando va clausurase esta edición de "Llanes al Cubo". Amás de les actividaes puntuales, a lo llargo de tol fin de selmana podremos visitar una Feria de Luthiers y otra de Llibru y Discu asturianos na Bombilla, una esposición d'escultures na Casa Conceyu de Llanes, amás d'otres esposiciones.

Pa saber el conteníu y los horarios de les actividaes non musicales de "Llanes al Cubo", invitamos a los nuesos llectores a visitar la nuestra guía d'ociu, onde van poder topar tola información.