Clinton destaca'l "nuevu camín" nes rellaciones ente Cuba y EE.UU

L'acuerdu ente Estaos Uníos y Cuba pa retomar les negociaciones directes sobre inmigración forma parte d'un "nuevu camín hacia alantre" ente dambos países, indicó esti llunes la secretaria d'Estáu norteamericana, Hillary Clinton.
 
El Gobiernu de Cuba solicitó'l pasáu sábadu mediante una nota l'entamu otra vuelta d'estes conversaciones, interrumpíes pola Alministración del ex presidente George W. Bush en xineru del 2004, y propunxo tamién el reestablecimientu de les negociaciones sobre l'unvíu postal ente dambos países, suspendíu dende hai décades.
 
"El presidente (Barack) Obama y yo tamos comprometíos con un nuevu averamientu", aseguró Clinton demientres una rueda prensa ofrecida n'El Salvador, onde asiste a l'asamblea de la Organización d'Estaos Americanos (OEA).
 
La secretaria d'Estáu norteamericana aseguró que la nueva aproximación del Gobiernu cubanu muestra'l "nuevu camín hacia alantre" nes rellaciones ente dambos países dende qu'a Obama lu elixeren presidente del país, recordando que demientres "los últimos cuatro meses" s'algamaron "más avances" de los que se ficieron en "dellos años".
 
Miembros del Gobiernu estaounidense informaron de que los dirixentes cubanos tamién mostraron el so interés en caltener conversaciones sobre narcotráficu, terrorismu y respuesta ante desastres naturales, cuestiones sobre les que dambos países se prestaron collaboración esporádica dende la imposición del embargu.