Una esposición itinerante enseña lo meyor del patrimoniu asturianu

El director xeneral de Promoción Cultural y Política Llingüística del Principáu Carlos Madera acudió ayeri a la inauguración de la esposición "Patrimoniu asturianu" compuesta por semeyes que retraten los elementos más importantes del patrimoniu del país

La esposición, que va pasar per toles cases de cultura d'Asturies a lo llargo d'esti añu 2005 qu'entama agora, presenta dende los afayos de la cultura castreña y prehistóricos hasta'l patrimoniu industrial y la Universidá Llaboral nun conxuntu de doce bloques temáticos qu'incluyen tamién el góticu, renacimientu, el barrocu o l'arquitectura popular y que mira con muncha atención pa los monumentos del prerrománicu

Na presentación, que se fizo na sé del Real Institutu d'Estudios Asturianos (RIDEA) nel Palaciu del Conde Toreno d'Uviéu, Carlos Madera repitió les declaraciones que ficiere la selmana pasada en Muséu del Pueblu d'Asturies cuando anunció que'l 2005 diba ser un gran añu pal patrimoniu asturianu, adelantando que diba facese un gran llabor nel estudiu del patrimoniu industrial y del patrimoniu inmaterial