Asturies va ayudar a les víctimes de la catástrofe n'Asia

El Gobiernu asturianu presentó esta mañana'l presupuestu que va empobinar nel 2005 a proyectos de cooperación y desarrollu nel estranxeru. En total son nueve millones d'euros, una cantidá que supón una xuba del 32% respective a la del 2004

El responsable de cooperación del Gobiernu asturianu, Rafael Palacios, esplicó que la cifra repártese en 4 millones d'euros pa la convocatoria de proyectos al Desarrollu, un 33 más que l'añu anterior, 0,5 millones pa educación y sensibilización, y 1 millón d'euros a acción humanitario, lo que supón doblar el presupuestu que se dedicó a esti separtáu nel 2004.

El maremotu qu'esti domingu fizo una de les mayores catástrofes de la historia nel océanu índicu mereció tamién el comentariu de Rafael Palacios, que denunció la falta de midíes tanto de prevención como de socorru pa les víctimes del maremotu. El Director de cooperación declaró que la cifra total de víctimes va pasar de les 200.000, una previsión que concuella cola que fizo Cruz Roxa Internacional.

Como primer pasu pa participar n'ayuda internacional a les víctimes de la catástrofe qu'afectó a tolos países qu'atiesten col Golfu de Bengala, el Conseyu de Gobiernu d'esta mañana dio de pasu, a petición de la Oficina de Cooperación, que se mande una partida de 300.000 euros con cargu al presupuestu de la mesma Oficina, p'ayudar a los países afectaos. D'otra manera, el Gobiernu asturianu entamó contactos coles ONGs locales y cola Secretaría d'Estáu de Cooperación pa facer actuaciones conxuntes d'emerxencia, aportando los equipos médicos que se precisen, medicamentos, ropa y otres coses de necesidá como pastielles pa potabilizar l'agua