L'Ayuntamientu de L.lena entama una nueva campaña de promoción de la llingua

"El Conceyu de L.lena, al traviés del so Serviciu de Normalización Llingüística, punxo en marcha esti martes la cuarta campaña de promoción del asturianu nel comerciu local. Baxo'l nome 'Ye como ye', la campaña ta empobinada a les fruteríes, carniceríes y pescaderíes, según informaron fontes del Conceyu al traviés d'una nota prensa.

En concreto, van distribuyise, de baldre, espetos pa poner nos productos de venta habitual nestos comercios. Estos espetos --60 diferentes-- lleven el nome del productu na variante llingüística de L.lena, col envís de potenciar la llingua patrimonial del conceyu. Asina habrá, por exemplu, cartelos colos nomes de 'cebol.la', 'sol.lumbu' o 'adobu'.

Pa cada sector editáronse 20 espetos diferentes, pa los que se buscaron los 20 productos más típicos que se puen atopar nuna carnicería, una frutería y una pescadería. La campaña va completase cola distribución de 21.000 bolses de plásticu pa los comercios baxo'l nome ""lo que necesites, lo que te presta, comerciu asturianu"". Con esta iniciativa, el conceyu de L.lena quier repetir l'éxitu de les anteriores ediciones, empobinaes al comerciu y la hostelería. El costu de la campaña ye de 2.000 euros, procedentes d'una sovención de la Conseyería de Cultura y Turismu.

Los oxetivos de la campaña 'Ye como ye' consisten en promover l'usu del asturianu nel comerciu y na imaxe pública del sector, amás de potenciar el papel de los comerciantes na promoción y normalización del usu del asturianu nel ámbitu de les rellaciones comerciales. Tamién quier implicase a los comerciantes y a la ciudadanía na normalización llingüística del sector. Escuéyese'l comerciu pa esta iniciativa por tratase d'ún de los puntos más importantes nes rellaciones cola ciudadanía. Col pasu del tiempu observóse una perda de les referencies asturianes en determinaos campos llingüísticos habituales de l'alimentación y el comerciu. Esta campaña preséntase como una ferramienta necesaria pa evitar la perda de les pallabres propies, faciendo por caltener la competencia llingüística asturiana.

La campaña desarróllase, un añu más, conxuntamente cola 'Rede de Normalización Llingüística nos conceyos'."