Un volume fai estoyu d'ocho temporaes de la Familia Castañón

Igor Medio ta acabante d'asoleyar "Too Castañón 1997-2004" un volume nel que'l dibuxante recupera toles tires cómiques de "La Familia Castañón" l'alloriante saga familiar que dende 1997 vien espublizándose nel suplementu de branu del periódicu "La Nueva España".

Dende 1997, Igor Medio, al que'l públicu conoz por ser ún de los componentes del grupu folk "Felpeyu" vien dándo-y fuelgu a la so vena d'ilustrador y dibuxante coles tires de la Familia Castañón. Baxo'l subtítulu de "Xente llano de Xixón" los cinco miembros d'esti clan de l'Asturies moderna y postreconversionista ayuden a pasar les noticies que vienen col periódicu y echar unes rises a cuenta de los estropicios qu'armen, pero, xorrascando na superficie del monigote y la patochada, nos "castañones" podemos descubrir nellos un retratu de l'Asturies actual comparable al que faen Los Simpson de la sociedá norteamericana o'l que ficiere la Familia Ulises de la postguerra española. Asina lo describe Juan Carlos Gea nel entamu a la obra y asina nos lo da a entender Igor Medio na interesantísima introducción qu'acompaña a "Too Castañón 1997-2004" antoloxía de les aventures de la Familia Castañón que recueye toles tires espublizaes estos años xunta otru material complementariu y interesantes comentarios del autor qu'ayuden a conocer la xénesis de la tira y la so evolución a lo llargo d'estos años.

Según Igor Medio, l'encargu que-y vieno pa facer la Familia Castañón mandaba que fuere una tira de costumes y ambiente asturianu, prestándo-yos atención a los acontecimientos del veranu. Partiendo d'eses premises, l'autor discurrió una familia qu'amestaba la esperiencia de la so infancia nel Nataoyo de Xixón cola so visión del mundu moderno. Ello espéyase nos personaxes adultos, los dos padres y el güelu, xente obrero pero con un pie entovía n'aldea y con muncha retranca, mientres que'l mundu moderno conozse al traviés de los personaxes de los dos fíos, ente los que rescampla la figura del guaje, un rapacín que nació talamente atornelláu a la Nintendo. Sobre esti grupu de personaxes, los ocho años de duración de la serie marcaron bien de cambeos de calter, una evolución que pue siguise a lo llargo de les cerca de 450 tires qu'igüen esti volume. El mesmu Igor Medio cuenta a los sos llectores como partiendo d'una situación d'indefinición, los protagonistes de la tira foron garrando caún una personalidá propia y como les esmoliciones del mesmu autor foron trescalando nos argumentos de la tira, faciendo tamién qu'un personaxe o otru garrare más protagonismu en determinaos momentos.

Xunta ello, Igor descúbrenos como los Castañones tamién conocieron una evolución estética y métenos n'alloriante dinámica del procesu de creación de cada tira, y amiesta tamién pistes pa conocer meyor a cada protagonista, casu del Güelu Castañón, clave angular de les aventures d'una familia polo demás bastante matriarcal que se-y ocurrió a Igor Medio a partir de dellos personaxes de les aventures d'Asterix (nun ye casualidá que Goscinny y Uderzo apaezan na llista d'agradecimientos).

Una de les característiques más novedoses d'esti primer recopilatoriu de la Familia Castañón, que'l mesmu autor s'encargó d'editar, ye la revisión llingüística de tolos testos y diálogos de la tira, llabor que tuvo al cargu del filólogu Fernando Álvarez Balbuena.

Dempués de too esto, namás queda una entruga, y ello ye saber si los Castañones van facer una aventura grñafica llarga. Igor Medio nun lo descarta