Zapatero nun alcanza a ser nomáu presidente na primer votación

"El candidatu socialista a la Presidencia del Gobiernu, José Luis Rodríguez Zapatero, nun llogró sumar esti mediudía nengún votu a los 168 apoyos apurríos polos diputaos presentes del PSOE, colo que nun pudo ser nomáu na primer votación nel Congresu, na que facía falta tener mayoría absoluta (176 votos).

Na votación celebrada esti miércoles nel Plenu del Congresu, Zapatero sólo pudo algamar los votos de los 168 diputaos presentes del Grupu socialista - faltó la canaria Mercedes Coello, con problemes pa viaxar a Madrid pol temporal - , demientres que'l PP, Esquera Republicana y Rosa Díez (Unión, Progresu y Democracia) votaron a la escontra, sumando 158. D'otru llau rexistráronse 23 astenciones de CiU, PNV, Izquierda Xunida, BNG, Coalición Canaria (CC), Iniciativa per Catalunya (ICV) y Nafarroa Bai.

Nun quedaron opciones pa cometer erros, yá que la votación foi pública y por llamáu, lo que supón que los 350 diputaos fueron poniéndose en pie ún a ún p'anunciar el so votu a viva voz. Un sortéu determinó que la votación entamara col diputáu d'IX, Gaspar Llamazares, que proclamó la so astención.

Al non algamar la mayoría absoluta nel primer intentu, la votación va repetise 48 hores dempués, el próximu vienres al mediudía. Nesi casu va valir con contar con más votos a favor qu'a la escontra. Ye la segunda vez na historia democrática d'España na que se necesita una segunda vuelta pa ser nomáu presidente del Gobiernu. El precedente ye Leopoldo Calvo Sotelo, d'Unión de Centru Democráticu (UCD), qu'en 1982 asumió les xeres del Executivu tres la dimisión d'Adolfo Suárez. Aquella votación, un 23 de febreru, pasó a la historia porque esa tarde prodúxose l'intentu de golpe d'Estáu d'Antonio Tejero."