El grupu San Félix espubliza un estudiu sobre la danza de Candás

El grupu de baille tradicional San Félix de Candás acaba d'espublizar un cartafueyu onde fai un pequeño estudiu de la danza del so pueblu.

El grupu de baille San Félix nació nel añu 1983 col oxetivu "d'amosar les dances y bailles d'Asturies", anque col tiempu entamaron a facer trabayu d'investigación col apoyu de la folclorista, y tristemente desapaecida yá, Fini Suárez Fernández. Frutu d'esti trabayu son publicaciones como estes qu'investiguen una parte del nuestru folclor dalgunes vegaes escaecío por tar mui cerca de les zones urbanes. Como comenta Xosé Ambás nel prólogu del cartafueyu, "naquellos años 80 nos que los grupos d'investigación buscaben lo arcaico y tradicional nes tierres más alloñaes del centru, descuidóse y dexóse perder bona parte de los materiales interesantes que teníamos a la puerta casa".

Pa nun dexar que'l so folclor más cercanu se descuide o se pierda, el grupu de baille San Félix saca esti trabayu qu'en poques páxines preséntanos les característiques básiques de la danza, les lletres que se canten, y qu'asturianu s'usa nelles, cuala ye la estructura de la danza en si, el son de la mesma y cuala ye la so situación n'actualidá. Esti "La Danza de Candas" ye'l primer númberu d'una serie que col nome de "Bailles y Dances del conceyu de Carreño" quier crear una bibliografía sobre cultura popular nel conceyu mariñán.