Muerren cuatro toliñes n'Asturies en menos de 48 hores

El Centru pa la Protección y Estudiu de les Especies Marines (CEPESMA) ta acabante de dar parte de l'apaición nes playes asturianes d'un total de cinco cetáceos muertos na costa central y occidental d'Asturies nel plazu de les últimes 48 hores. La llista entama con dos machos de toliña qu'alcontró la GuardiaCivil na gozoniega Playa de Xagó y que presentaben daños por arte de pesca, mientres qu'un pescador atopó una tercer toliña, esta n'estáu avanzáu de descomposición, na playa de Santa María del Mar, conceyu de Castrillón.

Yá pal occidente, en Valdés, pescadores d'angula dieron parte de la esistencia d'un machu de toliña acabante morrer na playa de Cuevas, pesllando la llista de varamientos un exemplar de calderón na playa de Las Barrosas (Andés - Navia). El CEPESMA tien pendientes les necropsies de los animales, pero yá da anuncia de que la mar revuelto y el mal tiempu d'estos díes desnortien con muncha facilidá a los cetáceos, siendo posible qu'acaben yendo pa contra les playes o que s'enreden nos artes de pesca, que d'otra manera suelen esquivar ensin mayor problema.