Crisis nel PP asturianu

Ayeri, Francisco Álvarez Cascos, que llevaba desapaecíu de la escena pública dende qu'anunciare que nun diba presentase a les elecciones de marzu, tornó con fuerza a l'actividá. Sorpresivamente, l'ex-ministru de fomentu dio anuncia de que se daba de baxa nel PP de Xixón. Cascos pidía'l trespasu de la so pertenencia nel partíu a l'agrupación de Madrid dempués de 28 años militando nuna agrupación local na que llevaba 28 años militando y que supunxo la so rampla de llanzamientu a l'alta política dende'l solitariu puestu d'únicu conceyal d'Alianza Popular por Xixón na primer llexislatura democrática. El veteranu políticu desenterraba l'hachu de guerra y declaraba que marchaba por culpa de la presencia al frente de l'agrupación de Pilar Fernández Pardo, figura emerxente nel PP local dempués de consiguir el meyor resultáu en munchos años del PP en conceyu de Xixón nes últimes elecciones a Conceyu nel 2003.

Les crítiques que se ficieron dende dientro del mesmu PP per boca de Pilar Fernández Pardo a l'anterior delegada del gobiernu n'Asturies, Mercedes Fernández, pola so actuación nel casu del control d'esplosivos en rellación a la trama del 11-M foron la causa a la que se refirió esplícitamente Álvarez Cascos pa pidir al partíu qu'interviniere contra Fernández Pardo, calificándola de "persona indigna". Según Cascos, la causa de la indignidá de Pardo vien de qu'esta pidiere que nun se propunxere a Mercedes Fernández pa más cargos públicos hasta que nun acabare'l llabor de la comisión investigadora del 11-M

La líder del PP en Xixón, que la selmana pasada consiguió tamién un ésitu al ganar el candidatu qu'ella defendía l'asamblea de les nueves xeneraciones del PP, reaccionó declarando qu'ella defendiere siempre'l llabor de Cascos nos gobiernos del PP y pidiéndo-y al ex - ministru que la defendiere a ella en cuantes que cabeza del partíu en Xixón escoyida democráticamente. Per otra parte, la diputada del PP por Asturies Alicia Castro, allinióse na defensa del llabor de Mercedes Fenández, amestando calificativos tamién mui duros contra la presidenta del PP de Xixón.