Laselmana económica

Los inversores ya tan faciendo les últimes apuestes del añu y recoyendo parte del beneficiu fechu a lo llargu d'esti exerciciu bursátil. Anque les duldes macroeconómiques siguen ensin resolver, la comunidá inversora celebra un ambiente festivu. De toles formes los brokers nun lo ven claro y yá dan anuncia de que l'añu qu'entra nun va pintar tan bien como esti si nun hai importantes cambeos estructurales na economía global.

L'IPC d'Estaos Xuníos tuvo una probetaya xuba del 0,2 nel mes d'ochobre. Un datu prudente que nun como pa indicar una recuperanza económica llibre de tensiones inflacionistes. Na Zona Euru'l datu más optimista foi'l la confianza empresarial n'Alemaña. Asina l'IFO alemán algamó los 96 puntos mentanto que los economistes contaben con 93 puntos. Ensin duldes ye una bona anuncia pa la llocomotora europea. Otramiente, la producción industrial na Zona Euru nel mes d'ochobre tuvo una cayida de mediu puntu.

Selmana con un vienres prietu pola xuba del petroleu y poles males anuncies nel sector farmacéuticu. Xunta esto'l vencimientu de futuros y opciones en dellos mercaos llocales tiraron p'abaxo de les bolses. Nel Vieyu Continente la Bolsa de París tuvo un cayida'l vienres pasáu del 1,7% siguío de Francfort con un 1,2% menos. El mal andar del sector tecnolóxicu y farmacéuticu tamién tiró p'abaxo de les bolses de Wall Street. Asina, l'índiz Dow Jones tuvo una cayida del 0,52% hasta los 10.469,92 puntos. El tecnolóxicu Nasdaq nun tuvo meyor día con una cayida del 0,51% hasta los 2.135,20 puntos.

Quinta selmana de xubes nun Ibex-35 que caltién perbien la cota de los 8.800 puntos. Históricu volume de negociu na Bolsa de Madrid con 5.526 millones d'euros movíos polos inversores. Nel terrén positivo destaquen Cintra, Ferrovial, Amadeus, Jazztel, TPI, Acerinox, ACS y Fadesa. A la contra Ercros, Zeltia, Enagás y Avanzit foron los valores con mayores cayíes. L'anuncia de la selmana foi la fola d'opes nel parqué madrilanu: OPA sobre Recoletos y sobre Aldeasa. Nel casu d'Aldeasa Caxastur tien una participación curiosa colo que si salir sal alantre la operación, la entidá financiera asturiana algamaría perimportantes plusvalíes.

Dempués d'un mes d'estabilidá'l petroleu torna otra vegada más a xubir con fuercia. L'interés de la OPEP de caltener precios altos escontra'l so discursu oficial ta llevando al barril Brent penriba los 42 dólares.

L'euru sigue reinando nel mercáu de divises énte un dólar bien feble. La divisa europea cotízase nos 1,3280 dólares unidá. Nel mercáu de renta fixo la rentabilidá del bund alemán nun supera'l 3,61%