Musica y muyeres nun discu

Amnistía Internacional, l'Axencia Asturiana de Cooperación al Desarrollu y l' Institutu Asturianu de la Muyer saquen a la cai un discu con cantares nos que la muyer ye'l tema central, Chus Pedro, Muyeres, Felpeyu o Joaquín Díaz son dalgunos exemplos de los participantes nesti discu.

El discu va presentase la tarde del llunes na Conseyería de xusticia con representantes de les trés instituciones promotores de la iniciativa, amás de dalgún interprete del cd. El discu entitúlase "Ta nes nueses manes: non más violencia escontra les muyeres", y forma parte d'una campaña más amplia de sensibilización sobre'l tema de la violencia de xéneru. Nél vamos topar 14 cantares d'artistes como Chus Pedro col so "Verdiciu", Muyeres, que canten "Los trabayos d'esti mundu" o Felpeyu "El Mio Xuan", el restu de los grupos y artistes son Joaquín Díaz, Fonsu Fernández, Xuan d'Amandi, Xuacu Amieva, Joaquín Pixan, El Presi, Xana y Tejedor.

El discu vien con un llibretín de 36 páxines coles lletres de tolos cantares, y un comentariu de caúna d'elles, acompañes tamién por semeyes de muyeres de toles partes del mundu. Esti discu, editáu por Fono Astur y masterizáu nos estudios La Factoría de Piedras Blancas, repasa d'esta manera distintes maneres de violencia contra les muyeres n'ámbitos bien diferentes.