La UE subvenciona l’ampliación de El Musel con 274,5 mllones

El Gobiernu asturianu tien confirmación de que la Unión Europea va poner más de 274 millones d'euros pa subvencionar l'ampliación del Puertu de El musel. La mayor obra civil de la historia d'Asturies queda asina pesllada cola llegada de la financiación comunitaria. El Principáu diz que va procedese a la llicitación de les obres nel plazu más rápido posible.

Anque'l puertu que se va construyir ye una alternativa menguada sobre'l Muselón que propunxere nel so día Francisco Álvarez Cascos, los datos de la obra conviértenla na mayor de la historia d'Asturies, dexando pequeña la construcción d'Ensidesa n'Avilés. La semeya qu'acompaña esta noticia recueye l'aspectu final d'esti puertu, que va ganá-y a la mar 140 hectárees de superficie y que va dexar la punta de la Campa Torres dos kilómetros p'atrás del dique nuevu, creando cerca de 4 kilómetros de llinia d'atraque nos que puen entrar al mesmu tiempu hasta trés barcos de 325 metros d'eslora y 230.000 tonelaes. La recreación, apurrida pol Principáu, incluye los depósitos de la planta regasificadora que se quier instalar en puertu y que diría venceyada a la creación d'una gran térmica de gas n'Aboño.

Na nota de prensa na que se presenta la obra, el Principáu esplica que se trata de meyorar los tráficos de graneles sólidos, pero tamién d'atropar tráficos nuevos, anque nun s'esplica cuálos, nun contestu nel que "resulta evidente la insuficiencia de les superficies terrestres portuaries de El Musel y de los metros d'atraque pa la xestión de los sos tráficos principales"

Agora que yá se dispón de la financiación, la llicitación de la obra quier facese enantes de qu'acabe l'añu. Pa ello, nos quince díes que-y queden a esti 2.004, van abrise les propuestes económiques que presentaron les 4 Uniones Temporales d'Empreses candidates a facer la obra, que tien un importe total de 580 millones d'euros (cerca de 100.000 millones de pesetes). Eses cuatro UTES son primero la qu'igüen Dragados - Drace - FCC - Alvargonzález y SATO; la segunda, con SACYR - Somague - Sánchez-Lago; la tercera con Constructora Hispánica, COMSA, SANDO y Duro Felguera y la cuarta con Ferrovial - NECSO - CEYD - COPROSA - Dredging Internationaly Jan de Nul.

Los políticos asturianos nun guardaben la so satisfacción énte la llegada de los 274,5 millones d'euros que roblen la construcción del nuevu puertu de El Musel. L'alcaldesa de Xixón, Paz Fernández Felgueroso dicía que la llegada de les perres d'Europa pa facer el muselón ye "el meyor regalu de fin d'añu que pue recibir la ciudá de Xixón". Anque pa contentu, el del Presidente asturianu. Álvarez Areces sorrayó que la Unión Europea dio "el total d'ayuda subvencionable, el 55% del coste del proyectu". Areces dixo que "garramos l'últimu vagón del últimu tren de los fondos europeos" y defendió'l papel de "elementu estratéxicu p'Asturies en décades que va permitir competir con otros puertos que yá s'ampliaron"

Por parte de los socios de gobiernu del PSOE, Jesús Montes Estrada, teniente d'alcalde de Xixón por IX, declaró que ye "la noticia mas importante pa Xixón y p'Asturies" y venceyó la obra del Musel al desarrollu d'otres infraestructures como la Variante de Payares y la Zona Loxística de San Andrés