Convocaos los premios a la creación lliteraria n'asturianu

"Acaben d'espublizase nel BOPA la convocatoria de los cuatro premios de creación lliteraria n'asturianu: ""Xosefa Xovellanos"" de novela, ""Xuan MªAcebal"" de poesía, ""Máximo Fuertes Acebedo"" d'ensayu y per primer vegada'l premiu ""MªXosefa Canellada"" de Lliteratura Infantil y Xuvenil.

El premiu ""MªXosefa Canellada"" garra'l nome d'una de les filólogues más sobresalientes del sieglu XX n'Asturies. Comprometida cola llingua asturiana dende los entamos del movimientu de recuperación, asoleya en 1980 el primer llibru n'asturianu empobináu al públicu más mozu, ""Montesín"".

Nacida en Piloña en 1913, Mª Xosefa Canellada estudia Filosofía y Lletres na Universidá de Madrid, doctorándose en Filoloxía Románica con premiu estraordinariu. Profesora nes universidaes de Salamanca y de la New York University in Spain, foi tamién redactora del Diccionariu de la Real Academia Española y collaboradora del CSIC. Comprometida cola recuperación de la llingua asturiana, Canellada participó na fundación de Conceyu Bable en 1975 y foi Académica de la Llingua Asturiana.

El Premiu "Xosefa Xovellanos" de novela algama esti añu la 29 edición, pudiendo presentase, hasta'l próximu 1 de setiembre, toles noveles inédites y ensin premiar n'otros concursos que tean escrites en llingua asturiana y cuenten con un llargor mínimu de 75 folios. El premiu, dotáu con 7.000 euros, cuenta ente la so llista de ganadores con Xulio Arbesú, Adolfo Camilo Díaz, Ismael González Arias o Miguel Solís Santos.

Pela so parte'l Premiu "Xuan MªAcebal" de poesía ta dotáu tamién con 7.000 euros, pudiendo presentase tolos poemarios inéditos que tengan un llargor mínimu de 500 versos. El ganador del añu pasáu foi'l poeta Pablo Antón Marín Estrada col poemariu ""Animal estrañu"".

Pa finar, el Premiu "Máximo Fuertes Acebedo" d'ensayu tien asina mesmo una dotación de 7.000 euros, premiando la interpretación y reflexón sobre la realidá. Esti añu llega a la so 14 edición."