Crítiques a l’ausencia del asturianu nel memorandum de Moratinos

La Xunta Pola Defensa de la Llingua píde-y al Gobiernu asturianu una rempuesta énte lo que considera "un agraviu". Pela so parte, Izquierda Asturiana, partíu que denunció primero'l tema, diz que la situación ye "surrealista"

El Ministru d'Asuntos Esteriores Miguel Ángel Moratinos entregó ayeri'l memorandum español pa la reforma del reglamentu de llingües de la UE, confirmando lo qu'adelantare va agora ocho díes el partíu nacionalista Izquierda Asturiana, que foi'l primeru en denunciar públicamente la marxinación a costafecha del asturianu nesti documentu. IAS apurrió-y a la Xunta Pola Defensa de la Llingua tola documentación de que dispón sobre l'asuntu, y la organización de defensa del asturianu ta acabante de posicionase públicamente na cuestión.

Anque'l Conseyeru Valledor y el Ministru Moratinos tuvieron esti veranu un intercambiu de correspondencia nel que Moratinos se comprometiere a da-y un "tratu especial" al asturianu, la llingua asturiana nun va tener accesu a un reconocimientu oficial européu de nenguna categoría. Pa más aquello, les declaraciones d'un conseyeru del Gobiernu valencianu qu'asoleyare la otra selmana IAS dexen pa prau'l futuru reconocimientu del asturianu na UE.

Ello ye que, según declaró'l Conseller de Rellaciones Institucionales de la Generalitat valenciana, Esteban González Pons, propunxérase-y al Gobiernu que nel memorandum a la UE s'esplicare que sedríen idiomes oficiales n'Europa los que tuvieren esti reconocimientu nel so estatutu d'autonomía respectivu. Dende'l Ministeriu retrucóse que diben llevar una propuesta pesllada y llendada a trés llingües (vascu, gallegu, y catalán) pa torgar qu'otros idiomes entraren dempués, faciendo referencia espresa al asturianu.


Pa la Xunta, la esclusión de la llingua asturiana nel memorandum ye "doblemente ofensiva" en primer llugar "pon de manifiestu la indefensión na que ta la llingua y los falantes de la mesma cuando'l gobiernu asturianu nun diz nada al respective". La Xunta señala como perda más grave pal asturianu'l fechu de que va quedar fuera de les ayudes del "programa lingua" de la UE.


En protesta, la organización va unviar una carta al ministru Moratinos "esixendo una rectificación" y una segunda al Presidente Areces "pidiéndo-y una reacción inmediata". Pela so parte, Izquierda Asturiana pide que'l Gobiernu Asturianu recurra énte'l Tribunal Supremu'l memorandum.