Piden esplicaciones por una obra de la papelera de Navia

La Coordinadora Ecoloxista d'Asturies ta acabante de pidi-yos esplicaciones al Conceyu de Cuaña y a la Viceconseyería de Mediu Ambiente del Principáu sobre una autorización que se-y dio a la empresa ENCE, titular de la papelera de Navia pa remocicar l'emisariu submarín que tien esta empresa pa soltar parte del so agua residual y qu'entra a la mar pela playa de Foxos (conceyu de Cuaña).

Los ecoloxistes sorrayen que la playa de Foxos tien una vexetación de sable mui importante, con especies que namás s'alcuentren en delles playes y que tan nos catálogos d'especies amenazaes de l'alministración asturiana, casu del Otanthus maritimus, una especie que namás s'atopa amás d'en Foxos nes playes de Sarello (Tapia), Navia, Frexulfe y Verdiciu. La pregunta de l'agrupación ecoloxista busca tamién saber si se pidió enantes de da-y el permisu a la papelera ENCE pa la obra una evaluación d'impactu ambiental al tar enxerta la playa dientro d'una zona LIC d'especial protección