Xuan Bello presentó les conclusiones del Alcuentru d’Escritores de Llanes.

La Xunta d'Escritores celebrada a últimos de payares en Llanes yá tien feches les sos conclusiones. Los 45 escritores presentes nel alcuentru concueyaron en facer un llamáu a la promoción de la lliteratura n'asturianu y demandar pal asturianu "un tratu d'igualdá col castellanu al traviés de la oficialidá". Sicasí, lo más llamativo de les conclusiones que Xuan bello presentó esta mañana en compañía del Director de Política Llingüística Carlos Madera, el Director de la Oficina de Política Llingüística Ramón d'Andrés y una representante del Conceyu de Llanes ye pidir qu'acabe la "ocultación" que sufre la lliteratura n'asturianu y facela "una más de les lliteratures de la españa plural".

Xuan Bello, escritor y coordinador de la Xunta, esplicó que, anque los llibreros asturianos acuten bonos llugares nes baldes de les sos tiendes pa los llibros n'asturianu, "lo que demuestra qu'esiste un compromisu y amás una realidá de negociu" la lliteratura asturiana nun tien la repercusión nin la promoción que merez, tanto dientro como fuera d'Asturies, y la riestra de títulos que s'espublicen van saliendo un trés d'otru ensin recibir la promoción que debieren, polo que'l públicu nun llega a tener conocimientu d'ellos". Ye por ello que los escritores demanden que l'alministración española de cultura cuente cola lliteratura n'asturianu nos premios nacionales de lliteratura y tamién que l'alministración asturiana deprenda de los métodos de la española faciendo polítiques de protección y formación pal autor en cuenta d'enfocar tolo que se fai al negociu editorial. Nesti sentíu l'autor de Paniceiros refirióse a les numberoses beques que pon el Ministeriu de Cultura a los escritores, una política qu'equí nun se fai y qu'ayuda muncho a meyorar la calidá de los autores. Nesti sentíu, Ramón d'Andrés esplicó a los presentes que'l Plan de Normalización d'Asturies, que ta pendiente d'aprobase d'equí a les próximes selmanes, contempla midíes de promoción al autor como les que piden los escritores aconceyaos en Llanes.

Xuan Bello nun quixo falar de da-yos periodicidá fixa d'agora en p'alantre a les Xuntes d'escritores, pero si quixo disculpase poles crítiques de dellos autores que nun recibieron convite pa participar nel alcuentru. Según el coordinador de la Xunta de Llanes "entiendo les quexes de los que nun pudieron dir y tan nel so derechu a faceles, pero intentamos facer una selección representativa de toles tendencies estilístiques y toles xeneraciones partiendo de la base de que namás podíemos llevar por imperativu material a 45 persones, cuando somos conscientes de que n'Asturies hai más de 300 persones dedicaes a la creación lliteraria n'asturianu".