Asturies prepárase pa clonar especies amenazaes

La Conseyería de Mediu Ambiente, Ordenación del Territoriu y Infraestructures y el Serviciu d'Investigación y Desarrollu Agroalimentariu (SERIDA), tan desarrollando un proyectu conxuntu que baxo'l nome "Xestión del estudiu, investigación y creación d'un bancu de conservación de recursos xenéticos d'animales selvaxes" quier atropar los datos xenéticos d'un númberu representativu d'exemplares d'especies amenazaes qu'aseguren la esistencia nel futuru d'estes especies per aciu de los métodos biotecnolóxicos más avanzaos. Ello ye, preparase pa clonar d'equí a la vuelta d'unos años, exemplares de les especies más amenazaes

El "Bancu de Recursos Zooxenéticos" d'Asturies va encargase d'ello, y, anque de mano namás se tenía previsto facer estoyu de célules somátiques (Fibroblastos) del pelleyu de los animales, l'enfotu del proyectu ye'l d'almacenar tamién material reproductivu (óvulos semen y embriones) de los animales en qu'ello seya posible. El material ta guardándose nes instalaciones del SERIDA de Xixón, que yá dispón de muestres de 22 especies distintes, de les que 19 d'elles yá se tien separtáu'l so ADN, ente elles osu, llobu, faisán montés y robecu, mientres que d'estes 19 hai 12 de les que se tienen amás fibroblastos, elementos que tienen una llarga vida almacenaos y dende los que se cuenta con poder facer, nun futuru, clones del animal en cuestión.

La técnica paez cenciella: dende biopsies del pelleyu d'animales muertos sepártense les célules que se conocen como "fibroblastos" que se multipliquen en llaboratoriu hasta consiguir un texíu que se guarda en nitróxenu llíquidu. La muestra de texíu revísase cada poco, faciéndose una copia nueva en casu de ser preciso, consiguíendose asina un bancu de datos biolóxicos de duración cásique indefinida. L'oxetivu final d'ello declaráu pol Principáu, ye'l de facer, puestos nel peor de los casos, clones d'animales que se desanicien nel futuru. La conseyería reconoz qu'entovía nun esisten técniques fiables pa la copia de seres vivos, pero entiende qu'estes han desarrollase "a lo llargo d'esti sieglu". A curtiu plazu, los oxetivos del Bancu de Xenes son más modestos pero mui interesantes. Trátase de facer estudios que permitan controlar y predicir la evolución de les poblaciones d'especies amenazaes.