El CAO convoca una concentración énte la Xunta Xeneral

"El Conceyu Abiertu pola Oficialidá convoca una concentración pal próximu llunes 14 d'abril a les 11.00 hores énte la Xunta Xeneral del Principáu, coincidiendo col aconceyamientu de los grupos parlamentarios al rodiu de la reforma del Estatutu d'Autonomía d'Asturies.

Dende'l puntu de vista del CAO ""esta nueva reforma ye posiblemente la última oportunidá de poder cuntar, por fin, con un estatutu que s'axuste a la nuesa realidá cultural y llingüística, y que reconoza los mesmos derechos a tolos ciudadanos, falen la llingua que falen"".

Nel testu de la convocatoria, rescamplen la situación d'inferioridá llegal que ta sufriendo l'asturianu, siendo ""la única comunidá con llingua propia que nun la reconoció como oficial"" nel so testu estatutariu, magar de qu'esti supuestu ta recoyíu nel artículu terceru de la Constitución española cuando diz "les demás llingües españoles (amás del castellanu) serán tamién oficiales nes respeutives Comunidaes Autónomes d'alcuerdu colos sos Estatutos".
Asina, sorrayen el momentu históricu nel que nos atopamos, teniendo de recoyer esta reforma ""la única reivindicación ciudadana n'Asturies que se vien manteniendo constante nos últimos trenta años"", ensin dexar que los ""intereses partidistes irresponsables condenen a muerte a una llingua que pertenez al pueblu asturianu dende va más de mil años""."