Multes d’hasta 6.000 euros por participar na fuelga d’enseñanza

Militantes de la Xunta pola Defensa de la Llingua Asturiana tuvieron ayeri una entrevista col Delegáu del Gobiernu n'Asturies, Antonio Trevín, énte lo que camienten que ye una campaña de persecución por iniciativa de les autoridaes.

Cuatro militantes y simpatizantes de la Xunta Moza enfréntense a multes d'ente 300 y 6000 euros por "ocupación de la vía pública" con motivu de la so participación na concentración que se fizo énte la Conseyería d'Educación el día 15 de payares dientro de la xornada de paru nos centros d'enseñanza media del país en protesta pola situación del asturianu nel sistema educativu. L'altísima multa que pue cayer sobre estes cuatro persones amiéstase a los 300 euros de multa que se piden tamién pa los 8 militantes de la Xunta Pola Defensa de la Llingua que se manifestaron en Cuadonga al pasu del presidente Areces con motivu de la celebración del Día d'Asturies nuna de les acciones de la "pita" de la Xunta. Too ello pue sumar, nel peor de los casos, más de 26.400 euros en multes

La Xunta pola Defensa de la Llingua decidió intervenir énte esta riestra de denuncies, que nunca nun sufrieren los miembros de la organización poles sos acciones pacífiques, motivu pol qu'ayeri representantes de la organización cívica tuvieron una entrevista col Delegáu del Gobiernu Antonio Trevín. Nesta "primer toma de contactu" los representantes del movimientu de defensa del asturianu esplicáron-y al Delegáu "la situación de persecución" qu'atalanten que ta sufriendo la so organización. "La Xunta", según esplicaron a Asturies.com miembros de l'asociación, ve que "hai intención de criminalizar a compañeros y amigos de la nuestra organización tres d'estes multes que nos abulten inxustificaes". "Por de pronto, l'asociación va poner tolos medios llegales precisos pa torgar estes sanciones, pero de siguir esta dinámica de criminalización sistemática, vamos venos nuna situación mui mala de llevar" declararon a Asturies.com dende la Xunta Pola Defensa de la Llingua.