Xeira denuncia la “inxerencia intolerable” del Plan de Normalización de la Xunta de Galicia

L'asociación cultural Xeira, defensora de la variedá llingüística propia de la comarca Navia-Eo, ta acabante de facer opública la so valoración del Plan de Normalización del Gallego, qu'aprebare la Xunta de Galicia'l pasáu mes d'ochobre y que propón midíes sobre'l "gallegu del esterior" y en concreto actuaciones especiales sobre la fastera del Navia-Eo.

L'Academia de la Llingua Asturiana asoleyó esti plan énte la opinión pública'l pasáu 22 de payares nuna rueda de prensa esti plan, denunciando lo qu'entendía yera una invasión de les competencies asturianes y un "intentu de galleguización del occidente d'Asturies". El Director de Política Llingüística Ramón d'Andrés, pela so parte, nun entró a valorar el plan anque sorrayó que les competencies asturianes en materia llingüística yeren asturianes, colo que'l plan quedaría ensin validez real, y condenó l'alarmismu de l'Academia de la Llingua, que taba faciendo lo que pa elli yera "una falsa polémica"

Xeira, organización de defensa de l'autonomía de la fala eonaviega, esplicó entós a Asturies.com qu'entovía nun tenía estudiáu el documentu de la Xunta de Galicia. Dempués d'unos díes d'analís, Xeira ruempe agora'l so silenciu y califica en términos mui duros el Plan de Normalización del Gobiernu de Galicia. Pa l'asociación de defensa de la llingua del Navia-Eo el plan ye una "inxerencia intolerable d'una comunidá a la que nun pertenecemos". Xeira afita la identidá asturiana de la xente que vive nel Navia-Eo, convidando a les autoridaes gallegues a mandar los sos enfotos espansionistes pa contra Portugal en cuenta d'echase sobre Asturies.

Representantes de Xeira esplicaron a Asturies.com que la so organización mandó cartes dirixíes personalmente al presidente del Principáu Vicente Álvarez Areces, a la Conseyera de Cultura Ana Rosa Migoya y al Director de Política Llingüística Ramón d'Andrés nes que se-yos reclama un posicionamientu contundente y una intervención rápida sobre esti particular. Estes cartes van acompañaes d'una cuarta a la Presidenta de la Xunta Xeneral María Jesús Álvarez González Principáu Mª José Ramos na que Xeira-y píde al Parlamentu Asturianu que faiga tamién un posicionamientu públicu a la escontra del Plan de Normalización de la Xunta de Galicia.