El Sporting garra fuelgu

El Sporting tenía obligación de ganar en campu de Pasarón énte un rival afondigáu na clasificación y que pierde sistemáticamente tolos partíos que xuega en casa, pero como del equipu de Marcelino nunca nun pue dase nada por seguro, foi preciso esperar cerca de media hora pa que la superioridá teórica se convirtiere en goles. Omar, únde los descubrimientos de la temporada, adelantó al Xixón convirtiendo una d'eses ocasiones que regala la picardía en forma de tracamundiu nel área. Lo qu'hasta esi gol fuere un partíu aburríu ensin mayor interés convirtióse darréu nun espectáculu del Sporting énte un equipu mui inferior, pero l'árbitrio diba cortá-yos l'allegria a los asturianos echando a Pablo Lago, que ya tenía una mariella por sonsañar un penalti y que cometió nel 43 una falta boba colaque ganó'l derechu a tornar pa la caseta.


Como si les pantasmes del Sporting volvieren, Garipe tuvo nun tris de facer l'empate enantes del descansu, pero un Roberto con más aciertu que'l de la otra selmana echó fuera la pelota. El segundu tiempu presentábase con mui mala traza pal Sporting, que se preparaba p'aguantar con ún menos., pero los asturianos supieron mandar con diez igual que lo fexeren col equipu enteru. Nel minutu 66 Ismael forzó un penalti qu'elli mesmu s'encargó de convertir y punxo la distancia precisa en marcador pa poder aselar un poco nel últimu cuartu d'hora, nel que los gallegos apretaron fuerte contra la portería de Roberto. El cansanciu físicu pesaba, y el Sporting llegó a tar cásique con nueve por culpa del güelpe en bazu que llevó Javi Fuego, momentu en que Charles convertió'l 1-2 pal Pontevedra. Anque los de casa tuvieron un par d'ocasiones, el brasileñu Arthuro, que salió por Ismael los diez últimos minutos, pudo marcar el 1-3 pal Xixón nuna llegada a puerta en que quedó solu contra l'arrebatedor del equipu gallegu. Elli y Omar demostraron que la quinta nueva de xugadores del Sporting va atoñando y qu'esiste un relevu na delantera del equipu anque falten Calandria y Biagini.

El Sporting sepártase de la zona de descensu y ponse a salvu na parte media de la tabla, anque lloñe de les places d'ascensu. Con 17 puntos, l'equipu de Marcelino ye'l 15 de la clasificación y espera la selmana qu'entra al Terrassa, l'equipu nel que xuega l'históricu Juanele. D'otra manera, la gravísima lesión que sufrió ayeri Yago torga la idea de la directiva sportinguista de recuperar cedíu al defensa del Celta pa la segunda parte de la temporada.