Más de lo mesmo nel Tartiere

Probe partíu nel Tartiere con xustu repartu final de puntos y que tuvo dos partes bien estremaes. Na primer metada l'Avilés mantuvo a raya en tou momentu a un Uviéu que nunca nun llogró superar el bon sistema avilesín. L'Avilés fízose rápidamente col sitiu nel campu y aguantó con calma los escasos emburriones ofensivos del Uviéu. Ésta situación tornóse enforma peligrosa pal Uviéu cuando l'Avilés entamó una serie de peligroses contres qu'acabaron por culminar nun gran gol de Moisés. Yera'l minutu 27 cuando ésti garró una bola nel centru'l campu y tres un gran xugada na que tamién tuvo la collaboración defensiva llocal, llantóse solu delantre Rafa Ponzo al que consiguió batir.


Na segunda parte camudó l'actitú d'un Uviéu que salió cola idea d'entornar el partíu. Tres d'una serie de bones aiciones d'ataque, sobre too pela banda derecha, Darío acertó a marcar un gran gol frutu d'una xugada de Xandru y Aldeondo. Foi un gol perguapu al que-y siguieron otres clares ocasiones, foi'l momentu del Uviéu pa llevase'l partíu. Rivas paeció nun acertar cambiando a los homes que taben llevando más peligru nel Uviéu y d'equí al final el partíu volvió a igualase y menguar el númberu d'ocasiones. Nel planu positivu namás que destacar la reapaición d'un ilusionante Jon Carrera al que se-y notó la falta de partíos.