La emigración asturiana debate sobre'l so relevu xeneracional

Ayeri presentóse na Conseyería de Xusticia, Seguridá y Rellaciones Esteriores el 1º Alcuentru de la Mocedá pola Asturianía del Conu Sur, un acontecimientu a desarrollase en Mendoza (Arxentina) ente los díes 20 y 24 de xineru de 2005, cola presencia de más de 50 mozos y moces d'ente 15 y 30 años de tolos Centros Asturianos de Sudamérica, amás d'una delegación de persones que van viaxar dende Asturies pa debatir sobre'l relevu xeneracional na comunidá asturiana emigrante.

Leonardo Quercetti, representante del Centru Asturianu de Mendoza y miembru del comité organizador, Maria Alonso de la Torre, Vicepresidenta del Conseyu de la Mocedá d'Asturies y el director Luis Miguel Fernández Romero, presentaron esta actividá cola que, según Luis Miguel Romero, quier buscase una mayor participación y vinculación de los representantes de "los nuevos fenómenos de movilidá xeográfica", y de los descendientes d'emigrantes, cola so tierra d'orixe. Nesta área contémplase facer foros y alcuentros d'emigrantes mozos como espacios de reflexón y de debate sobre la realidá d'Asturies y la so comunidád'emigrantes

Leonardo Quercetti Sánchez, llamó l'atención sobre l'orixe d'esti alcuentru, qu'esplicó que vieno de la "necesidá" d'analizar la participación de los descendientes d' asturianos nos Centros Asturianos d'América Llatina y qu'estes nueves xeneraciones tengan una mayor participación na vida de los Centros Asturianos.

L'alcuentru va entama'l 20 de xineru y preténdese que tenga continuidá faciéndose ún cada dos años. D'otra manera, va intentase tamién que l'acontecimientu tenga la mayor repercusión posible a nivel local, creando una web pa dalu a conocer y llamando l'atención de los medios de comunicación del llugar.