REM dan anuncia de que van tocar en Xixón

Xixón perdió anguaño perres a espuertes col conciertu de Paul Mc Cartney, pero ello paez que nun va acabar cola política del conceyu de facer, lo menos una vegada al añu, un gran macroconciertu, siguiendo con una tradición qu'entamó va yá quince años con Tina Turner y que siguió con xente como Sting, David Bowie, Dire Straits o Bruce Springsteen.

Pal 2005 los candidatos yeren REM, el grupu americanu qu'entamó nos 80 como una banda de pop alternativu y que, cola llegada de los noventa, convertióse nun grupu de mases gracies al discu "Out of time". D'entós p'acá, el grupu enllenó estadios per tol mundu, y ye ún de los pocos artistes capaces de garantizar el llenu onde vaya. Dende'l conceyu queríen caltener la dulda de si diben venir o non y de la posible fecha de l'actuación, pero'l casu ye que los mesmos REM adelantáronse al Ayuntamientu y dan anuncia na web oficial del grupu de que van tocar el 29 de mayu de 2005 en Les Mestes, un conciertu que va ser l'únicu que dean per tola costa del cantábricu, pero non n'España, onde la banda yá tien acutaes dos feches, el 8 y 9 de xineru, en Madrid y Barcelona.