Carlos Madera presentó'l I Congresu del Horru

El Director Xeneral de Promoción Cultural y Política
Llingüística Carlos Madera asistió esta mañana a la
presentación oficioal del I Congresu sobre l'Horru, que va desarrollase
nel Auditoriu Príncipe Felipe d'Uviéu'l 29 y el 30 de payares y
nel que va tratase sobre esti elementu del paisaxe asturianu dende
múltiples perspectives, falando tanto del valor que tien como patrimoniu
y cultura como de la técnica aplicada a la so construcción y les
sos perspectives de futuru. Xunta'l congresu van desarrollase tamién delles actividaes paraleles,
ente les que destaquen una esposición sobre l'horru nos trabayos del
dibuxante Alfonso, creador de los populares Pinín y Pinón o una
visita guiada esti domingu 28 al Muséu de Belles Artes d'Asturies na que va facese un repasu a l'apaición del horru nos cuadros de la colección permanente del Belles Artes


Xosé Nel Navarro ye'l coordinador d'esta iniciativa particular na que tamién participen directamente l'historiador del arte Gerardo Díaz, l'arquitectu Xuan Pedrayes Obaya y Margarita Llorente, especialista en técniques de la madera.


El programa del congresu, que pue consultase na web d'Horru.com céntrase esclusivamente nel horru asturianu, dexando aparte graneros elñevaos d'otra frasca o procedencia y organízase alredor de cuatro "pegoyos" o
exes temáticos. El primeru d'ellos centráu nel "horru como
arquitectura" va contar cola participación d'arquitectos como
l'asturianu José Angel Rivas Andina o'l gallegu Pedro de Llano. El
segundu pegoyu "L'horru na historia" céntrase na
evolución a lo llargo del tiempu del horru y va entrar tamién en
cuestiones artístiques, participando nesta estaya l'antropólogu
Roberto González-Quevedo y el director del muséu del Pueblu
d'Asturies Juaco López. La segunda xornada del congresu va repartise
ente los otros dos pegoyos, pela mañana "l'horru material" va
analizar los problemes de conservación d'estes construcciones y los
distintos tratamientos y acciones restauración que puen facese. Pela
tarde los espertos participantes nel pegoyu últimu "L'horru y el Turismu"
van esponer les posibilidaes de desarrollu del potencial del horru como
elementu d'atracción pa los visitantes.