Los fundadores de Conceyu Bable faen repasu 30años dempués

Los organizadores de los actos de celebración de los 30 años de Conceyu Bable organizaron ayeri n'Uviéu una xinta d'homenaxe a los socios fundadores de l'asociación. L'ausencia destacada de Xosé Lluis García Arias, que refugó'l convite, pesó nuna reunión polo demás bien prestosa y estrada d'anécdotes y hestories pero que tuvo muncho de reflexón sobre la figura histórica de CB trés décades dempués. Amelia Valcarcel, Xuan Xosé Sánchez Vicente, Lluis Xabel Álvarez y Carlos Rubiera, colos que participó nel alcuentru Graciano García, editor de "Asturias Semanal" la revista qu'asoleyó los escritos de Conceyu Bable, dieron puntos de vista mui distintos sobre l'ayeri y l'agora de la reivindicación llingüística. Asturies.com participamos d'esti alcuentru, del qu'entesacamos darréu les aportaciones más interesantes.

L'escritor Xuan Bello, qu'actuó d'anfitrión de la xinta, abrió'l turnu d'intervenciones sorrayando la importancia de Conceyu Bable como colectivu que llanzó la idea de qu'Asturies yera una comunidá con cultura y llingua propies, echando a andar al rau d'ello un importante movimientu llingüísticu y lliterariu que tamién tuvo una parte sociopolítica de la que guañó la idea de "Asturies como identidá" nun momentu en que "nengún partíu de tol espectru políticu tenía idea de cómo podía articulase Asturies como ente políticu nin como comunidá autónoma".

Tres de les pallabres del autor de Paniceiros vinieron les del que foi "anfitrión de papel" de Conceyu Bable, Graciano García, daquella editor de "Asturias Semanal" y anguaño presidente de la Fundación Príncipe d'Asturies. "Chano" como lu conocen tolos históricos de CB, destacó la trescendencia histórica de Conceyu Bable como "ayuda a la autoestima d'Asturies" y emponderó'l fechu de que los llogros de la organización, d'aquella empequeñecíos, agora vuelven con fuerza, faciendo un convite a da-y continuidá al proyectu de CB.

Una de les coses en que concueyaron tolos asistentes foi na sorpresa pola trescendencia que paez que garra CB a los trenta años del so nacimientu, asina, el profesor d'estética de la Universidá Lluis Xabel Álvarez declaró que taba "mui feliz de qu'otros se sientan heriedes d'aquel movimientu, que foi un llabor xeneracional" y emponderó'l calter de "proyectu intelectual de vanguardia" de la organización, que supunxo "la mayor aportación a la cultura asturiana nel sieglu XX" pero dexando aparte la celebración, el fundador de CB resumió en trés puntos mui claros lo que-y abulta que falta entovía pa rematar el camín que s'abriere en 1974. D'una parte, Lluis Xabel apuntó mirando pa Graciano García que ye precisa "una mayor proyección internacional d'Asturies, un llabor que-yos correspuende a munches organizaciones y entidaes". La culminación del procesu de reconocimientu de la llingua cola oficialidá, que yá vien con retrasu, ye según Lluis Xabel, otru de los llogros imprescindibles pa culminar l'ideariu de CB, que tendría d'acompañase no político pola presencia nel parlamentu d'una "fuerza política asturiana independiente d'obediencies centralistes", daqué que Lluis Xabel ve como "una obligación pa poder completar el panorama políticu asturianu y qu'esti seya normal"

Eses carencies que se rexistren trenta años dempués violes tamién Xuan Xosé Sánchez Vicente. El líder históricu del Partíu Asturianista, que concueyó na valoración de les aportaciones de Conceyu Bable al discursu políticu y social foi quiciás el más pesimista del grupu de fundadores de Conceyu Bable, resumiendo'l so sentimientu de derrota trenta años dempués en que "de la qu'entamamos nun contábemos con que díbemos tar asina nel añu 2.000, porque Conceyu Bable abrió un camín que tenía que ser pa crecer, y non p'afalaganos nin p'aguantar". Sánchez Vicente llamentó como ún de los fracasos históricos que ye'l día de güei que muncha xente-y tien "repelús" a la cultura asturiana

Nes causes d'esa dentera polo asturiano escarbó Amelia Valcarcel, con muncho la más irónica nes sos intervenciones de tol grupu de fundadores. La filósofa y directiva del patronatu del Muséu d'El Prado declaró que se sentía mui estrañada de que "con ser los pocos que yéremos en Conceyu Bable y col pocu alcance que teníemos, paez mentira qu'haya tanta xente que fizo carrera política y cultural ensin más méritu que'l de posicionase sistemáticamente a la contra de tolo que dicíemos d'aquella la xente de Conceyu Bable". Valcarcel punxo tamién una mirada distanciada pero emocionante sobre l'espíritu d'aquellos años, un tiempu en que "queríemos dalgo nuevo, y por eso lo inventábemos too, dende la bandera al idioma o mesmamente coses como'l Puxa Asturies". amestando darréu d'ello que "naide inventaba más que nosotros, sacantes el Partíu Comunista, pero menos mal que'l modelu d'asturianu lu ficimos nosotros, porque si llega a caer en manes d'otros…". L'espíritu de llucha y de confrontación col aparatu cultural de la época que supunxo nos años 70 Conceyu Bable resumiólu Valcarcel nun acontecimientu simbólicu, cuando Xuan Xósé Sánchez Vicente nun acudió a recoyer el premiu lliterariu que-y concedieren los "amigos de los bables" entidá na que taben León Delestal y otros autores venceyaos al RIDEA. La que foi conseyera de cultura nos años 80 refugó la posibilidá de resucitar Conceyu Bable que plantegaron los otros asistentes al actu, concluyendo que "Conceyu Bable nun pue resurdir porque ganó", una frase rotunda cola que dio a entender que al conseguir el so oxetivu principal (la creación de l'Academia de la Llingua) CB entró nuna fase d'autoliquidación, pero con ello nun quixo dicir tampoco que se llograre tolo que proponía CB, llamentando Amelia Valcarcel que, trenta años dempués d'aquello entovía nun disponemos d'un "modelu de convivencia"

Ún de los asistentes al alcuentru que más aportaron coles sos idees foi Carlos Rubiera. El cantante nun formó parte del núcleu fundador, pero esplicó qu'elli tenía 18 años la primer vez que vio los escritos de Conceyu Bable en "Asturias Semanal", unos testos que tuvieron nelli un efectu "de catarsis" que-y fizo "sentime falante d'asturianu, falante d'un idioma distintu". Rubiera recordó que-y faltó tiempu pa dir a apuntase a aquello, recibiendo'l carné númberu 12 de CB. Según Carlos Rubiera, CB foi una idea brillantísima que-y valió pa muncho personalmente y destacó que "Daquella yéremos mui inconscientes de les dificultaes que suponía sacar alantre Conceyu Bable, pero de nun ser precisamente por aquella bendita inconsciencia aquel proyectu nunca nun pudiere cuayar".