Ezequiel Cala ganó'l concursu de relatos de Cangas del Narcea

L'autor de Xixón Ezequiel Cala ganó'l concursu de cuentos del Conceyu de Cangas del Narcea, onde yá consiguiere premios menores n'otres ediciones, siempre escribiendo n'asturianu occidental.
Collaborador del periódicu La Nueva España de Xixón dende l'añu 98, Ezequiel Cala (Xixón 1976) ye llicenciáu n'Historia y, anque nació en Xixón, vien de familia de Cangas, desenvolviéndose mui bien nel asturianu occidental. El so relatu "M.E." valió-y los 600 euros del primer premiu.

Dase la circunstancia de que'l conceyu acutaba tamién un premiu especial aparte del absolutu pal meyor relatu n'asturianu occidental. L'autor de Cangas Diego Rodríguez Martínez, natural de Tandes anque residente en Málaga foi'l ganador d'esti premiu, dotáu tamién con 600 euros pol relatu "Pente neveiros".

El segundu premiu del concursu absolutu foi pal relatu "Un día de mayu", del historiador xixonés Pablo Rodríguez Alonso (1979). Finalmente, el periodista de Radio Llangréu Naciu Varillas consiguió col so relatu "Branu eternu" el tercer premiu, de 180 euros.


La conceyala de Cultura, Mónica Díaz, y el secretariu de l'Academia de la Llingua Asturiana, Roberto González-Quevedo, presidieron el xuráu y destacaron la cantidá de relatos n'asturianu occidental que se presentaron al concursu y la calidá de los mesmos