Presentóse'l programa oficial de los 30 años de Conceyu Bable

La selmana del 20 al 27 de payares va celebrase n'Asturies el 30 aniversariu de l'apaición de Conceyu Bable, colectivu del que guañó l'actual movimientu de recuperación de la cultura asturiana.

En payares de 1974 la dictadura de Franco entovía tenía cuerda pa tirar otru añu más, pero publicaciones como la revista "Asturias Semanal" convertíense nun de los espeyos mediáticos del surdimientu d'una nueva sociedá plural y democrática. Esi mesmu mes, "Asturias Semanal" estrenaba una nueva sección entitulada "Conceyu Bable" escrita dafechu n'asturianu que taba al cargu de trés persones, el filólogu Xosé Lluis García Arias, el filósofu Lluis Xabel Álvarez y el profesor de lliteratura Xuan Xosé Sánchez Vicente. L'ésitu de la sección, na que bien pronto entamaron a collaborar más persones, bien d'elles dende fuera d'Asturies, demostró que "Conceyu Bable" yera más qu'una sección dientro d'una revista, constituyéndose nel 1975 como una asociación cultural llegalizada. De les sos campañes y propuestes derívase col tiempu tolo qu'anguaño se conoz como asturianismu con toles sos variantes, y de lo que nun cabe dulda nenguna ye de que Conceyu Bable, que llegó a contar los sos socios por miles, foi ún de los movimientos sociales más importantes nel últimu cuartu del sieglu XX n'Asturies.

Dende mañana día 20, va desarrollase con motivu d'estos 30 años un ampliu programa d'actos qu'esta mañana presentaron el cantante Xune Elipe, Nacho González y el responsable de cultura de Mieres Ismael González Arias, trés de los miembros de la comisión qu'organiza l'acontecimientu. Asturies.com yá adelantare lo más importante d'esti programa, qu'agora que yá ye oficial y definitivu ponemos completu pa descargar dende esti enllaz