L'Entregu fai alcordanza del tiempu de "Camaretá"

Samartín del Rei Aurelio participa nel programa d'actos de los 30 años de Conceyu Bable con un homenaxe a la figura del grupu Camaretá, guañu del que saldría dempués el grupu musical "Nuberu". El Teatru Municipal de L'Entregu va ser l'escenariu onde esti martes 23 de payares entame a les 20.00 hores un homenaxe a esti grupu tan activu na recuperación de la cultura asturiana nos años 70

El nome de Camaretá vencéyase siempre col de Nuberu, l'esitosu grupu musical de Chus Pedro y Manolo peñayos, pero tres del nome de Camaretá hebo muncho más qu'un conxuntu musical. La curtia aventura de Camaretá, ún de los grupos asturianistes paralelos a Conceyu Bable más activos y quiciás el más politizáu de toos ellos, nació nel Atenéu de Sotrondio en xunu de 1975, y ente los miembros del grupu taben Manuel Asur, Nel Xiblata, Manolo B. Peñayos, Xuan Marcos, Chus Pedro Suárez, Alberto G. Del Pozo, Aurora Roces, Francisco J. Fraile, Teresa Estrada, David Suárez Zapico y tamién xente como Xosé Lluis García Arias, Benigno Delmiro Coto o Amador García. Ente toos ellos sacaron alantre un proyectu que se definía como cultural y sociopolíticu y que, al mesmu tiempu que s'identificaba col movimientu obreru internacional, mantenía un espíritu críticu contra la falta d'un discursu d'identificación nacional p'Asturies.

Yá enantes de convertise nun grupu organizáu, los miembros de Camaretá veníen participando nes actividaes que s'organizaben nel Club Cultural 'La Amistad', de L'Entregu, y nel Atenéu de Sotrondio. Anque lo que más importante del llabor de la xente de Camaretá son los trabayos lliterarios y musicales, les sos actividaes abarcaben lo cultural y lo político, cola llingua asturiana como ferramienta d'espresión y pue dicise que como arma d'acción sociopolítica.

Amás del homenaxe del martes, la historia de Camaretá va poder vese tamién estos díes en Samartín del Rei Aurelio gracies a la esposición 'Aquellos años de Camaretá' que s'inaugura oficialmente'l 22 de payares na Casa la Cultura de L'Entregu.