Costes defende la operación en Vidíu mientres los pescadores entamen la protesta

Los pescadores de Cuideiru van dar guerra pola obra que'l ministeriu de Mediu Ambiente quier facer enfrente de Cuideiru, onde estos díes tien d'entamar la saca de cerca de mediu millón de metros cúbicos d'arena pa bombialo hasta la Playa de Salinas. Una subvención europea de 9 millones d'euros ta en xuegu casu de nun facese la obra enantes de qu'acabe l'añu. Pela parte de los pescadores, vese que la obra pue dañar gravemente'l caladeru, polo qu'ayeri entamaron una campaña de protestes col corte, más d'una hora, de la carretera n-632 al pasu pel conceyu.

La Demarcación de Costes, organismu dependiente del Ministeriu de Mediu Ambiente, defende que la obra de Vidíu ye "imprescindible y necesaria dafechu" pa "crear una playa importante p'Avilés y Asturies". Según Costes, de nun facese la obra n'acabando l'añu, l'Estáu tendría de devolvé-y a la UE 9 millones d'euros de fondos FEDER, ayuda que punxo Bruseles con cargu al proyectu de "recuperación de la Playa de Salinas" y que, según diz Costes, yá se gastaron nes obres del proyectu que yá tan feches.

Costes defende tamién que'l proyectu, diseñáu pol gabinete del PP nel añu 99, yá dicía que l'arena de Vidíu yera la meyor en términos mediuambientales, ello con nun ser la más averada a la playa a recuperar. Costes tiense en que'l gobiernu anterior nunca nun cuestionó la obra y nun informe, ellaboráu n'ochobre del 2003 pol Institutu Oceanográficu que diz testualmente que "les especies móviles van escapar mientres dure'l dragao y van volver n'acabando la obra cuando aposiente'l fondu". L'organismu estatal diz que "n'otros llugares d'España (nun s'especifica en cualos) onde se sacó sable del fondu de la mar, la osixenación que fizo l'actuación sobre'l fondu ayudó a que se rexenerare'l bancu de pesca arreyáu, lo que se convertió nun volume mayor de captures de pexe los años siguientes a la obra".

De cualquier manera, l'Alministración diz que "sigue abiertu" el diálogu colos pescadores pa evitar posible daños que se pudieren producir na operación