La fuelga d'enseñanza, en Conceyu Abiertu

Cuando va facese una selmana de la fuelga d'enseñanza, la repercusión de la convocatoria que paralizó bien de centros d'enseñanza en tol país en defensa de la escolarización del asturianu sigue viva, cola organización convocante (Xunta Moza) y la Conseyería d'Educación metíos nuna guerra de cifres sobre l'asistencia real a la fuelga. Dende Xunta Moza consideróse que'l fechu de qu'educación entrare a esa guerra de númberos yá demostraba que la fuelga consiguiere l'oxetivu marcáu. N'Asturies.com proponemos-yos a los nuestros llectores debatir en Conceyu Abiertu: ¿Crees que les condiciones d'enseñu del asturianu van meyorar dempués de la fuelga?.

Mientres, siguen aportando más datos sobre casos d'institutos nos que les directives de los centros torgaron la participación de los estudiantes nel paru convocáu por Xunta Moza'l pasáu miércoles 10 de payares.

La última ye la del IES de Ciañu, onde'l paru anduvo según datos de la organización convocante de la fuelga pel 70%, un tantu por cientu altu si se tien en cuenta que'l director pasó per toles aules esixendo a los que quixeren facer la fuelga una autorización del pa o la ma, cola sida de que nun teníen derechu a facer fuelga. Según Xunta Moza, padres de neños qu'estudien nesti centru esplicaron qu'hebo hasta un profesor qu'aprovechó pa poner por sorpresa un esame'l mesmu día del paru. Con ello contábase que la fuelga diba fracasar, pero ello foi qu'hacia les 12 del mediudía del miércoles 10 presentáronse allá un grupu grande de padres colos sos fíos p'apoyar la fuelga. N'acabando l'esame los padres garraron a los sos fíos y lleváronlos otra vuelta pa casa, un casu ensin paralelu en denguna fuelga d'enseñanza.

Xunta'l casu d'esti IES de Llangréu hebo otros que llamen l'atención pal "anecdotariu" de la fuelga, como l'IES de l'Infiestu, onde un grupu de rapacinos ficieron casu de les alvertencies d'apertura d'espediente que-yos fizo la directiva del centru y volvieron pa clase, pero llevando, en señal de protesta, banderes d'Asturies y camisetes cola Cruz de la Victoria.

Otramiente, según munches de les denuncies que tan llegando a la Xunta Moza, la táctica de ponese na puerta pa torgar que los estudiantes salieren de clase foi xeneralizada, como ye'l casu de la quexa d'un estudiante del IES "Emilio Alarcos" de Xixón, onde'l xefe d'estudios decidió ponese na salida del centru impidiendo abandonar les clases. Los estudiantes afectaos quieren facer una protesta y van aprovechar la ocasión pa pidir que se-y cambie'l nome al centru pol d'un escritor asturianu, como yá se propunxere nel añu 1997, cuando l'IES "númberu 7" pasó a llevar el nome del famosu filólogu, enemigu de la normalización del asturianu.

Responsables de Xunta Moza esplicaron que la selmana qu'entra van facer un conceyu estraordinariu pa "tratar toos estos casos de represión"y ver que posibles midíes llegales puen adoptase