Más violencia que fútbol nel Tartiere

El Real Uviéu y el filial del Sporting nun movieron el marcador. Empate a cero nun partíu marcáu pola tensión y les engarraes, nes que participaron públicu y futbolistes.

El Sporting B y l'Uviéu enfrentábense nel Tartiere nun de los duelos más esperaos de la campaña. La presencia nel once de Mareo de Jairo, la promesa uvieina fichada pol Sporting, enraxonó a l'afición carbayona, que foi en bloque al Tartiere a presenciar un partíu nel que taba en xuegu muncho más que los trés puntos. L'afición azul recibió a Jairo con insultos y frases de toa triba, pero'l desarrollu del alcuentru diba dar entovía más polémica.

De cualquier manera, lo que nun hebo nos más de noventa minutos d'ayeri foi fútbol. Trés llegaes a puerta del Uviéu y una namás, anque espectacular, del Sporting, qu'obligó a espurrise a Rafa Ponzo, foron el saldu d'una tarde de futbol tristaya na que l'árbitrio prendió la mecha d'una situación yá mui caliente. Ello entamó cuando Yeray y Rojas s'engarraron al dir a sacar una falta.

El xugador del Sporting dio-y un cabezazu al carbayón, que cayó al suelu, apaeciendo darréu l'árbitrio Iglesias Hortal cola inevitable y merecida papeleta encarnada pal futbolista de Xixón. Armóse entós un gran espolín porque Rojas, que paecía víctima d'un ataque de nervios, negábase a salir del campu. Diez minutos tuvo paráu'l xuegu en medio d'una engarrada llamentable que demostró que, lo mesmo que cuando los dos equipos se víen en primera, los derbis son partíos nos que pesa más la tensión que'l fútbol. Ello treslladóse tamién a los seguidores más violentos del Uviéu, que s'engarraron con un aficionáu del Sporting obligando a intervenir a la policía. Los radicales azules llegaron a disparar una bengala, lo que podría traer una sanción pal equipu.

El Real Uviéu sigue líder destacáu de tercera, pero nun pudo igualar el récord de trunfos, mientres que'l Sporting B convertióse nel primer equipu en puntuar esta temporada nel Carlos Tartiere.