Valledor aconceyó con Saura pa falar de la reforma del estáu

El Conseyeru de Xusticia, Seguridá Pública y Rellaciones Esteriores del Gobiernu d'Asturies, Francisco Javier García Valledor, aconceyó ayeri en Cataluña col Conseyeru de Rellaciones Institucionales y Participación del Gobiernu d'esta comunidá autónoma, Joan Saura. L'alcuentru fízose na sé del Parlament catalán y nelli los dos políticos falaron sobre la futura reforma del modelu d'Estáu, abarcando temes como'l remocique del Senáu o los cambeos nos estatutos d'autonomía.

Valledor y Saura punxéronse al día sobre la marcha d'esti procesu nes sos respectives comunidaes y concueyaron na importancia d'estos alcuentros para cambiar puntos de vista ente les Comunidaes Autónomes, falando Valledor de la importancia de francer cola incomunicación institucional ente les comunidaes autónomes. Según Valledor, ye importante qu'ente les comunidaes qu'igüen l'estáu esista una comunicación horizontal paralela a la vertical qu'hai ente les comunidaes y l'estáu como un preséu más pa facer la "España plural"

El Conseyeru asturianu defendió énte Saura que cada comunidá ha apautar el ritmu d'afondamientu y desarrollu del autogobiernu que-y abulte más afayadizu "partiendo del reconocimientu de la igualdá de derechos políticos, financieros, llingüísticos y competenciales de toles comunidaes y asegurando los elementos de cohexón y solidaridá interna nel conxuntu del Estáu". Saura y Valledor tamién tuvieron d'alcuerdu nel modelu de participación de les comunidaes nel marcu de la UE, y asina Cataluña va defender el mesmu modelu qu'Asturies na comisión d'Actividaes Rexonales de la UE

La llingua asturiana entró na conversación ente los dos conseyeros, y foi'l mesmu Joan Saura quien-y entrugó por ello a Valledor, amosando una bona disposición a tratar el tema, anque según Valledor, tampoco nun se faló d'oficialidá nesta reunión.