Lleguen los conciertos del Festival de Cine

El Festival Internacional de Cine de Xixón va caleciendo motores cola presentación ayeri de los conteníos del so tradicional programa paralelu de conciertos, nel que van amestase distintes propuestes dende'l rock and roll, el rythm&blues, el house y la música electrónico. La sala Albéniz, el Café Bambara y la discoteca Parque del Piles van atechar los conciertos del certame, que va entamar el día 25 d'esti mes y que termina'l 3 d'avientu

Ente los grupos que van participar van tar Australian Blonde, que presenten nel festival el vienres 26 na Sala Albéniz el so nuevu discu, entituláu "Canciones de Amor y Gratitud", el grupu Reel People, nominaos a la meyor banda en directu nos House Music Awards ingleses 2004; el grupu Oslo Telescopic (Domingu 28 a les 12 de la nueche nel Café Bambara), mecigayu de rock, hip hop y disco. El nixerianu TY (Xueves 25 na Sala Albéniz) una de les referencies de la escena hip hop británica; el DJ Dean Rudland, director del sellu Acid Jazz cuando esta casa de discos espolletó a primeros de los 90; y el DJ de San Francisco John Howard, tou un mayestru del groove. Los vascos DeLorean (Martes 30 na Sala Albéniz) y el grupu de pop Babamars (Llunes 29 na Sala Albéniz) son otres de les propuestes musicales del Festival de Cine