Hevia yá tien club de fans en Rusia

El nome del Jose Ángel Hevia Velasco cada vez llega más llonxe, esta vegada la gaita de Jose Ángel suena na estepa rusa al traviés d'una web.

Anque'l músicu maliayés yá nun tea en tantes portaes de periódicos nin suene tanto na radio, el "fenómenu Hevia" sigue furrulando y de la música del gaiteru asturianu yá nun se puede dicir que fuere una moda de pocu tiempu. Ello ye que'l gaiteru tien munchu nome en países como italia, Rumanía y otros países de centroeuropa, incluso, en bien d'ellos tien más fama qu nel propiu Estáu Español. La preba d'esto tenémosla por exemplu nel club de fans qu'hai na menos qu'en Rusia. Esti club tien una web, que ta en rusu dafechu, onde pueden vese secciones cola biografía del gaiteru, discografía y foru de discusión. Amás na web rescampla la posibilidá de que los fans rusos-y manden correos al mesmu Jose Ángel.

Per otru llau'l gaiteru ta preparando los cantares pal so próximo discu, que sedría'l cuartu cola casa de discos EMI. Amás el gaiteru tamién ta trabayando na posibilidá de facer daqué con músicos asturianos volviendo d'alguna manera a los sos oríxenes.