El Tribunal Superior almite la denuncia por prevaricación en "Fuentes de Invierno"

El Colectivu Montañeru Por la Defensa de los Picos d'Europa recibió ayeri carta de la Fiscalía del Tribunal Superior de Xusticia d'Asturies na que se daba parte de l'apertura de dilixencies pol escritu de denuncia que presentaren conxuntamente'l 25 d'ochobre'l mesmu colectivu, la Coordinadora Ecoloxista y l'Asociación Asturiana d'Amigos de la Naturaleza y nel que se denunciaba a l'alministración asturiana por prevaricación na obra de la estación de deportes d'iviernu que'l Gobiernu asturianu ta faciendo nel Altu Ayer.

La denuncia de los trés grupos teníase en que la construcción del accesu a la estación, la primer obra dientro de la construcción del parque, ta faciéndose en suelu que ta catalogao como "non urbanizable de protección especial" cosa que los grupos yá denunciaren nes alegaciones que presentaron al proyectu y que quedaron ensin rempuesta, en cuantes que'l conceyu ayerán dio de pasu les obres ensin que se resolvieren primero les alegaciones que presentaren.

Los grupos ecoloxistes argumenten que les normes subsidiaries urbanístiques d'Ayer "tan entovía en vigor y especifiquen que, no tocante a suelu non urbanizable ha aplicase lo que diz na normativa urbanística asturiana pal mediu rural". Estes normes apauten la torga de «toa actividá, edificación o cambéu d'usu que pueda implicar la tresformación de la naturaleza". Ello afecta tamién a "edificaciones o instalaciones d'interés social o utilidá público, construcciones o instalaciones venceyaes a la execución, construcción o edificación" aspectu que sorrayen los ecoloxistes porque dempués de la obra del camín d'accesu tien de venir la de la base d'operaciones de la estación.

Los ecoloxistes ven mal que l'entamu de la obra nun pasare pel trámite de l'aprobación na CUOTA (Comisión d'Urbanismu y Ordenación del Territoriu del Principáu d'Asturies) y per un plazu d'información pública, y na denuncia agora almitida a trámite pola fiscalía, solicitaben que s'estudiare si hebo o non prevaricación al informar favorablemente del proyectu sabiedo que diba contra les normes, causa pola que pidíen inhabilitación especial pa empléu o cargu públicu por tiempu de siete a diez años y prisión de seyes meses a dos años o la multa equivalente. La decisión ta en manes del TSXA.