Música del mundu dende Ayer

La VIII Muestra de Música Tradicional "Tocando pelos
Pueblos" trae esti vienres al conceyu d'Ayer música de Bulgaria,
Francia y d'Asturies.



Yá van pa ocho los años que lleva los
Humanitarios de
Samartín entamando esta muestra na que podemos ver formes bien
diferentes d'entender la música, discursos llonxanos y cercanos a la
hora de facer música tradicional. Esta vegada la muestra ufiertanos la
posibilidá de d'averanos por exemplu a la música búlgara
con "Rodopis".
Esti ye un grupu de búlgaros residentes n'España que comparten un
gran amor pola música tradicional del so país. Con esta base
punxéronse trabayar pa sacar alantre esti proyectu nel que podemos
sentir "a virtuosos de la gaita, el clarinete o'l curdión,
enganchando melodíes bien guapes en compases de trece por
dieciséis". Dempués de Bulgaria vamos dar un saltu a Francia
cola presencia del grupu "Estar", concretamente de la zona de la
Gascuña.



L'aportación asturiana a la muestra va ser "DRD", el
tríu formáu por Dolfu Rodríguez col vigulín, Diego
Pangua cola xiblata y Rubén Bada col bouzouki. Estos trés
músicos siguen trabayando nesti proyectu que tien traza de llegar llonxe
yá qu'adulces va garrando cada vez más personalidá.
Amás del triu tamién vamos poder ver a les pandereteres Marta y
Natalia.



La cita pa ver esta muestra ye esti vienres a les 20:00 hores nel
"Auditorio Cine Carmen" de Morea d'Ayer con entrada llibre.
Música pa dir caleciendo'l cuerpu pa
les fiestes
de Morea del próximu día 11.