La Coordinadora Ecoloxista alega contra una cantera nueva en Candamu

El pueblu de Llameiru ye'l llugar onde la empresa Calizas de Pravia quier abrir una cantera nueva. La Coordinadora Ecoloxista, aprovechando'l periodu d'esposición pública del proyectu, ta acabante de solicitar al Principáu a que nun lu autorice pol impactu que pue producir "nuna zona rural bien conservada".

Los ecoloxistes ven que la cantera va tener un impactu ambiental "críticu" sobre'l paisaxe, la vexetación y morfoloxía final de Llameiru n'acabando la esplotación, y camienten que va tener un efectu "severu" sobre'l mediu humanu de la redolada por culpa de los ruios, vibraciones y la contaminación atmosférica. El dañu sobre los restos arqueolóxicos del llugar ye otra de les preocupaciones del grupu ambientalista, anque lo que más-yos preocupa son les condiciones de recuperación del llugar a les que se compromete la empresa n'acabando la esplotación. La empresa comprométese a una "restauración forestal parcial" cuando la Coordinadora lleva años pidiendo que'l Principáu pida l'aval pola restauración dafechu del llugar al da-yos el preste a los proyectos. Como datu estadísticu pa demostrar la falta de compromisu nel tema de la restauración, la Coordinadora diz que n'Asturies esisten 805 canteres de les que tan n'esplotación 107 y de les que nenguna ta restaurada.

Otru asuntu de gravedá pol que se reclama nes alegaciones ye'l de que'l proyectu contemple la llexislación sobre sonoridá, pa lo que ven preciso que se disponga una pantalla de sebe pa menguar el ruiu