Ecoloxistes n’acción denuncia l’usu del agua d’El Nalón

La organización "Ecoloxistes n'Acción" ve que ta priorizándose l'usu del agua embalsao del Nalón pa la producción de corriente, ello cuando l'embalse de Tañes-Rusecu taba en marzu al 90% de la so capacidá y agora ta baxo mínimos.

L'embalse de Tañes,que nel mes de marzu taba al máximu de la so capacidá, presentaba a últimos d'ochobre un aspectu llamentable, con un mínimu históricu nes sos reserves. Ecoloxistes n'acción rellaciona esta baxada de la reserva d'agua cola priorización del usu del agua del embalse pa usos enerxéticos. Pa los conservacionistes, ello vien del añu 1997, cuando la llei 54/1997 del Sector Eléctricu apautó'l conceptu de "competencia ente los usos del agua" y pasó d'un sistema de "costes reconocíos" a otru de "ufierta competitiva" qu'aumentaba'l beneficiu del aprovechamientu del agua en saltos hidroeléctricos.

Al ser el de la corriente un mercáu lliberalizáu nel que los productores vierten a la llinia xeneral electricidá que se subasta acordies cola llei de la ufierta y la demanda, los ecoloxistes defenden la tesis de que, nel momentu en que los precios de la corriente son altos, el beneficiu económicu d'utilización del agua del Nalón como recursu enerxéticu dispárase, lo que ta llevando a un usu abusivu de los recursos eléctricos que pue amenazar la reserva del recursu d'agua potable que ye la presa de Tañes, qu'apurre l'agua a tola Cuenca'l Nalón y bien del Centru d'Asturies.

Los ecoloxistes aporten datos, y dicen que, mientres nos 80 y hasta mediaos de los 90 nunca nun se produxeron na central de Tañes-Rusecu (de 123 mw de potencia) ente 70 y 90 GWh, pero cola entrada del nuevu marcu llegal l'usu de la central xubió hasta los 160 GWh.

Arriendes de que ven nello un marafundiu d'un recursu públicu que ta xenerando beneficios particulares a la empresa titular de la central (Hidrocantábrico) los ecoloxistes camienten que, en casu de tener de priorizase l'usu humanu del agua, torgando l'emplegu de la mesma pa la producción de corriente, la compañía eléctrica podría reclamar una indemnización económica. D'otra manera, el fechu de que seya la xeneración eléctrica la que ta vaciando l'embalse de Tañes da-y a Ecoloxistes n'Acción un argumentu más pa oponese a la construcción del embalse de Caliao, que'l gobiernu autonómicu defende como "necesariu pa garantizar el suministru d'agua".