Raimundo Amador foi la estrella del esitosu Llanes al Cubo

La bona acoyida que-y dio'l públicu a la edición d'anguaño de "Llanes al Cubo" asegura futures ediciones, y l'apueste pola apertura d'estilos musicales nos conciertos.

El Conceyu de Llanes ta mui satisfecho col resultáu d'esta edición del festival cultural "Llanes al Cubo". Dende'l Conceyu aseguraron que nesta edición superóse'l record de públicu, y que bona parte culpa d'ello tienlo'l conciertu de la nueche del sábadu de Raimundo Amador, El Bicho y Chambao onde se vendió tol papel con más 2.500 espectadores. Los conciertos folk del vienres y del domingu pela nueche, onde tuvieron bandes como Felpeyu, Flook o Altan, xuntaron a más de 1.600 persones ente les dos nueches, anque la presencia de públicu pudo baxar estes dos nueches poles descomanaes tormentes que cayeron tantu'l vienres como'l domingu de nueche. Con too y con ello, el númberu d'espectadores y participantes aumentó en toles actividaes del festival, cines,charres, esposiciones...etc. Dempués d'estos resultaos 'l Conceyu volvió a afitar el so compromisu con esta iniciativa, apostando pola filosofía de convertilu nun festival de les músiques del mundu trés d'algamar el bon resultáu d'anguaño.