Valledor diz que peligra'l pautu col PSOE

La ellaboración de los presupuestos d'Asturies abrió otra resquiebra nel Gobiernu asturianu, nel que conviven PSOE y IU. La otra selmana, Izquierda Xunida presentaba una propuesta presupuestaria na que desarrollaba lo que yá anunciare Noemí Martín nel debate D'Orientación na Xunta Xeneral del Principáu. La propuesta d'IX basábase en pidir qu'asturies franciere col déficit cero y s'atreviere a endeldase con tal d'aumentar el presupuestu y facer más inversiones. La propuesta d'IX recibió la rempuesta del Conseyeru de Facienda Jaime Rabanal, diciendo que los presupuestos del 2005 yá taben pesllaos y que nun cabía remocicalos.

El conseyeru de Xusticia, Seguridá Pública y Rellaciones Esteriores, Francisco Javier García Valledor, retrucó pela so parte que'l papel d'Izquierda Xunida nun ye'l de facer de "oyentes" sonsañando a Alfonso Guerra, que dicía va tiempu que lu teníen "d'oyente nel Gobiernu",

Valledor ofreció al so partíu pa collaborar y llegar a un alcuerdu nestes selmanes partiendo de la base de que "nun gobiernu de coalición nun pue haber una propuesta unilateral a la hora d'ellaborar un presupuestu" sobremanera cuando'l presupuestu ye la clave pa echar a andar munchos de los compromisos del pautu de gobiernu, que la coalición d'izquierda diz que peligra en casu de nun haber alcuerdu presupuestariu