David Heap, presencia destacada nes Xornaes d'estudiu de l'ALLA

L'Academia de la Llingua organiza pa últimos d'esti mes (25 al 27 d'ochobre) les tradicionales Xornaes Internacionales d'estudiu de la Llingua Asturiana, a celebrar na Facultá de Filoloxía y que lleguen con esta a la so XXIII Edición. El programa definitivu de les mesmes pue consultáse yá na web de l'ALLA, y nelli rescampla la presencia de David Heap, profesor de la Universidá d'Ontario (Canadá) que dende va unos años p'acá ta atropando y compilando los datos del Atles Llingüísticu de la Península Ibérica (ALPI), ún de interesante llabor de Ramón Menéndez Pidal y Tomás Navarro Tomás que, hasta va bien poco, taba dixebráu en cachinos sueltos per biblioteques particulares y colecciones d'universidaes. David Heap va falar el martes 26 a les 16:30 nuna conferencia que va centráse nes encuestes y cuestionarios del ALPI n'Asturies, onde l'equipu de Tomás Navarro Tomás, director del ALPI, fizo encuestes idiomátiques en 24 puntos xeográficos allá pelos años 30 del sueglu XX.

Otra de les presencies destacaes d'esti congresu va ser la de Paquita Suárez Coalla, profesora d'español y lliteratura na Universidá de la Ciudá de Nueva York que va falar sobre "La escritura desde llingües amestaes: oralidá, lliteratura y clas social". Ello va ser el miércoles 27 a les 19:30h, mientres que Carmen Muñiz va falar sobre "La entonación y el rasgu de conxuntos prosódicos na carauterización d'una llingua". Roberto González-Quevedo, que va falar de "Símbolos y sangre" nuna charra que va entrar en cuestiones antropolóxiques y Emilio Ridruejo Alonso, que va poner una conferencia entitulada "El aprovechamiento de los mecanismos analógicos en los procesos de estandarización de las lenguas. El ejemplo del asturiano" pesllen el programa de conferencies d'estes xornaes, qu'incluyen amás un total de 16 comunicaciones