D’Andrés nun sabía de la reunión de responsables de política llingüística de Barcelona

Esti xueves celebróse en Barcelona, na sé del Institut d'Estudis Catalans, la primer Xornada Sobre la Regulación del usu de les Llingües nel Estáu, una convocatoria entamada directamente por iniciativa del Conseller en Cap Josep Bargalló col oxetivu d'apautar ente tolos gobiernos autonómicos con llingües minorizaes nel so territoriu y les academies llingüístiques d'esos idiomes unos puntos de vista de consensu sobre les midíes de protección y promoción que tendríen de dase dende'l Gobiernu español y sobre l'estatus llegal que tendría qu'abellugar y reconocer a toles llingües del estáu. Aportar argumentos y idees pa la redacción d'una futura Llei de Llingües estatal, proyectu que contempla l'executivu del Presidente Zapatero yera l'oxetivu d'esta xunta, que s'organizó alredor de dos meses de trabayu, una cola presencia de les academies llingüístiques y na que tuvieron les instituciones normativizadores d'Asturies, Galicia, Euskadi y Cataluña y otra cola presencia de les autoridaes polítiques en materia llingüística de cada autonomía. Nesta otra mesa tuvieron presentes los gobiernos de Galicia, Cataluña, Euskadi , les Islles Baleares y Aragón.

L'ausencia más importante na xunta foi la de Valencia, que nun mandó representantes a nenguna de les dos meses. El fechu de que la iniciativa viniere de Cataluña, cola que'l Gobiernu Valencianu tien abonda rocea en materia de política llingüística, pero no tocante a Asturies nun dexaba d'estrañar que mientres l'Alla participaba na so mesa correspondiente, nun hubiere naide en representación del Gobiernu asturianu, que tien, dende va yá pa un añu, un responsable propiu de Política Llingüística na persona de Ramón d'Andrés.

Puestos en contactu dende Asturies.com col responsable de la Oficina de Política Llingüística, d'Andrés esplicó a esti mediu que s'enterare de la reunión de Barcelona "pelos medios de comunicación" y que naide nun lu avisare de la so esistencia. N'enterándose de la noticia, d'Andrés faló col Director Xeneral de Política Llingüística y Promoción Cultural Carlos Madera, que-y esplicó a d'Andrés "que tampoco nun tenía conocimientu de la convocatoria".

Asturies.com púnxose darréu en contactu col departamentu de Josep Bargalló pa esclariar el por qué de l'ausencia del gobiernu asturianu de tan importante convocatoria. Dende la secretaría del Conseller en Cap de la Generalitat confirmóse a Asturies.com que'l Gobiernu asturianu yera efectivamente ún de los convidaos a participar na mesa de debate, unviándose pa ello una comunicación a l'atención de la Conseyera de Cultura Ana Rosa Migoya. Según esplicaron a esti mediu dende la secretaría de la Consellería, la comunicación "con fecha del 13 de xunetu" recibió rempuesta negativa por parte de la Conseyera de Cultura y Vocera del Gobiernu asturianu, quien "escusó oficialmente la so presencia por tener esi mesmu día (xueves 8 d'ochobre) una reunión ordinaria del Conseyu de Gobiernu" d'Asturies. El conteníu de la convocatoria nun llegó, como podría mandar la lóxica, a conocimientu del Director Xeneral de Política Llingüística Carlos Madera, cargu inmediatamente subordináu, nin tampoco al del Director de la Oficina de Política Llingüística, Ramón d'Andrés, persona directamente interesada nel conteníu de la xornada de debate. La non comunicación de la convocatoria tien tola traza de dir a poner un nuevu enzancu na sintonía ente la Oficina de Política Llingüística y los sos superiores en Gobiernu