El Salamanca marchó d'El Molinón colos trés puntos (1-2)

El Sporting llevó ayeri'l güelpe más duru de lo que se lleva de temporada. Anque nel campu demostró que yera superior al Salamanca, que tuvo a la defensiva tol partíu, l'angoleñu Ze To alcontró en dos errores de la defensa asturiana la ocasión pa da-y el trunfu a un Salamanca faltu de puntos.

La cosa entamó mal. Namás pitar l'arbitro, Zé To alcontró un furacu y adelantó al Salamanca nel minutu 1 de xuegu. El Sporting, que tien l'alliniación completamente tracamundiada con Samuel de defensa y Pablo Álvarez de punta, tardó n'esconsoñar, pero nel minutu 32 l'esfuerzu del Sporting alcontró premiu al rematar de cabeza Pablo Álvarez un centru de Dorado. Col empate nel marcador, la segunda parte escomencipió con un gran ataque del Xixón, que pudo adelantase con un trallazu de Juan que dio nel maderu. Sicasí, los minutos pasaben y el feble ataque del Sporting, que namás yera a colgar balones muertos al área, nun yera abondo pa francer la embaruyada defensa d'un Salamanca que diba cargándose de tarxetes pasín ente pasu. Tomás, el defensa más duru del equipu visitante, vio la segunda mariella nel últimu cuartu d'hora.

Foi entós cuando'l partíu dio un reblagu definitivu. Marcelino vio'l cielu abiertu al quedar el Salamanca con 10 y sacó al defensa Neru pa meter otru punta, Arthuro, que quedó inéditu. Con llinia de trés atrás, el conxuntu asturianu quedaba espuestu a la contra salmantina, que yá tuviere nun tris de marcar per aciu de David Cano, que quedó solu delantre del rebatiador del Sporting pero picó alta la pelota. Ze To, velea y martiellu executor del Sporting na tarde d'ayeri, apaeció nel últimu intre pa rematar al equipu asturianu. El desastre llegó con u balón que nun tenía de tener mayor complicación pa Sastre, pero'l futbolista del Sporting, que llevaba un gran partíu y tuviere nun tris de marcar el 2-1, empixóse cola pelota, regalándo-yla a Ze To. L'angoleñu tuvo más picardía que Sastre y fizo un gran control de la pelota pa dar la media vuelta dientro del área y frayar a Roberto, que nun pudo atayar el balón. El públicu tomólo peor que l'equipu, y más de mediu Molinón (14.500 espectadores ayeri) marchó del asientu mientres los de casa intentaben iguar el desastre con más gana que xeitu.

Con esti resultáu'l Sporting sigue con 8 puntos y ta namás ún puntu penriba de la zona de descensu a Segunda B, qu'entama precisamente a l'altura del Salamanca.