Valledor empondera l’asturianismu de los fíos de los emigrantes

El gobiernu del Principáu d'Asturies fizo a lo llargo d'esta selmana un viaxe institucional al conu sur d'América que remató ayeri. El recorríu de la comitiva asturiana, encabezada pol Presidente Álvarez Areces incluyía l'Arxentina Chile, l'Uruguay y el Brasil, última parada na qu'Areces entrevistóse col presidente y Premiu Príncipe d'Asturies Lula da Silva. Del alcuentru ente los dos presidentes salió la posibilidá de que'l brasileñu vuelva a visitar Asturies nos XXV años de la Fundación Príncipe d'Asturies, pero l'axenda del viaxe incluyó tamién una misión empresarial que cuayó en contactos con Chile pa la collaboración ente puertos asturianos y chilenos.

El Conseyeru d'Asuntos Esteriores, Javier Valledor, participó tamién nesti viaxe, nel que llevó alantre un doble llabor rellacionáu per una parte cola Dirección Xeneral d'Emigración y per otru cola de Cooperación Internacional. Na última parada del viaxe,onde diba tener un alcuentru colos asturianos del Centru de Sao Paulo, Javier Valledor tuvo un intre pa falar con Asturies.com.

- Nesta xornada en Brasil entrevistóse usté con Frei Betto, ún de los responsables del programa "Fome Zero" col que'l Gobiernu brasileñu intenta desaniciar la fame del país ¿en qué proyectos collabora Asturies con esti programa?

Ente munches coses destacaría una esperiencia pionera
al traviés de la dirección de Cooperación Internacional. Ello ye qu'equí, nel noroeste del Brasil esiste una rexón bastante grande na que queríen poner un gran saltu d'agua como solución pa los problemes de falta d'agua potable. La verdá ye que'l debate que tienen equí sobre esti asuntu nun dexa de recordame al del Tresvase del Ebro, pero les soluciones alternatives que s'apliquen equí van ser más imaxinatives, y consisten en facer embalses más pequeños y más espardíos colos qu'aprovechar l'agua de lluvia, colo que se garantizaría l'accesu de la población al agua potable ensin falta d'una gran obra d'infraestructura. Tamién vamos collaborar con ONG's asturianes en programes d'acción educativa, pa lo que tuvimos una reunión en Brasilia. En total son siete los proyectos de cooperación que tenemos con Brasil, por un importe de 750.000 euros

- D'otra manera, nesti pasu pel Brasil tamién va conocer a la comunidá asturiana del país…

Sí, agora mesmo venimos de ver a Dolores Muñiz, una monxa asturiana que ta faciendo un trabayu impresionante nuna favela de Querentenario asitiada nunos terrenos contaminaos por una multinacional francesa. Gracies a xente como ella llevamos una visión significativa de la realidá d'un país que tien 56 millones d'escluyíos. Marcho d'equí cola idea de proponer a esta muyer pa una de les medayes d'Asturies como exemplu de trabayu y solidaridá d'una asturiana nel esterior

- Amás de personalidaes destacaes, tamién se visitaron los centros asturianos d'América del Sur...

Ficimos un recorríu peles cases y centros asturianos que vamos rematar agora mesmo nel de Sao Paulo, que ye una colonia bien importante a la que queremos tresmitir el nuestru sofitu con esta visita p'animalos a facer actividaes y da-y vida al centru. El viaxe valiónos tamién pa comentar con ellos de primer mano los conteníos del Plan d'Emigración 2004-2007, que tien nel exe asistencial una de les sos prioridaes. Nesti sentíu, la inversión más fuerte de la que dimos anuncia nel viaxe son los 15.000 euros que se van invertir nel Hogar Español de Montevideo.

- Xunta'l colectivu d'emigrantes nacíos n'Asturies, nesti viaxe pudo conocer a los asturianos de segunda y tercer xeneración. ¿con qué impresión vien d'ellos?

Salgo d'equí con una percepción mui positiva d'ellos, sobremanera pol sentimientu d'identificación que tienen con Asturies y la intensidá del vínculu con tolo que-yos representa la tierra de los sos padres y güelos. Si los asturianos que tamos nel interior viviéremos Asturies como la viven los asturianos emigraos de segunda y tercera xeneración, la situación pa la llingua, cultura y les tradiciones asturianes diba ser mui otra.

- Cambiando de tema, la diputada del PP Inmaculada González criticó muncho esti mesmu xueves na Xunta Xeneral del Principáu la Conseyería que dirixe usté pol gastu que fai en viaxes y por facé-yos falses promeses a los emigrantes en materia d'atención sanitaria y retornu. Según González el Plan d'Emigración y la Llei de Salariu Social van con un añu de retrasu y a los emigrantes prométese-yos que van alcontrar trabayu n'Asturies si vuelven

Abúltame que la visión que tien el PP d'esi asuntu ye provinciana y paezme qu'esta muyer nun debió lleer el Plan d'emigración. En primer llugar los viaxes son necesarios pa ponese en contactu con otres realidaes y pa dase a conocer. Precisamente una de les coses sobre les que más nos llamaben l'atención los emigrantes colos que falamos nesti viaxe ye la poca proyección y presencia que tien Asturies nel estranxeru. D'otra parte, el Plan va según el calandariu marcáu y la Llei del Salariu Social va aprebase nesti 2004, que ye a lo que nos comprometimos. En cuantes a lo de les falses promeses, nun sé d'au saca la diputada que se-yos prometiere a los emigrantes trabayu en volviendo a Asturies, anque otra cosa ye que'l Plan d'Emigración tien por primer vegada una estaya específica dedicada a la problemática del retornu a Asturies. D'otra parte, el nuestru compromisu ye dar les places n'establecimientos del ERA, viviendes y atención sanitaria que diz el plan.