Andecha Astur celebra la Revolución d’Ochobre

El partíu políticu Andecha Astur organiza la so propia axenda d'actos pa esti ochobre en que se cumplen los 70 años de la Revolución asturiana. Ún de los actos más importantes d'esti programa va ser mañana sábadu 16, cuando la organización va facer un actu d'homenaxe nel cementeriu de Pandu (Llangréu) énte la tumba del socialista Belarmino Tomás, figura destacada de la revolución qu'ocupó'l cargu de presidente del comité revolucionariu y que na Guerra Civil diba sr presidente del Conseyu Soberanu d'Asturies y Llión. De tarde, a les 17:00, la organización va facer otru homenaxe, esti a los "Mártires de Carbayín" nel cementeriu de la localidá sierense. El tercer actu d'homenaxe previstu en programa va ser el vienres 22, a les 23'00 hores, con una concentración ciudadana en Sama énte la Casa Conceyu de Llangréu, n'alcordanza de los revolucionarios y revolucionaries muertos en 1934.

La organización va aprovechar tamién estos díes pa facer la presentación pública d'un llibru escritu por Mariano Suárez Rodríguez y que baxo'l títulu "¿Quién escaeció a Belarmino Tomás?. Socialismu y soberanía n'Asturies", ofrez la visión d'esti partíu sobre la biografía del líder revolucionariu y la historia asturiana del tiempu en que vivió, sobre'l qu'entienden que se llevantó una "historia del poder" contra una "historia maldita" y escaecida qu'agora vien a descubrir esti llibru . Pa presentar la obra van facese conferencies en delles ciudaes, entamando'l martes, 19 d'ochobre; en Xixón. (local de la Corriente Sindical d'Izquierda (c/ Sanz Crespo, 3 19:30h). El xueves, 21 d'ochobre va ser n'n'Avilés, a les 20'30 hores nel Llar d'Andecha (c/Rivero, 102), el miércoles 27 d'ochobre n'El Berrón (Siero), a les 20'30 hores nel Llar d'Andecha (Av. Santander, 4), el xueves 28 d'ochobre en Villaviciosa a les 20'00 hores na Casa la Cultura (c/ Agua, s/n) y el vienres 12 de payares n'Uviéu a les 20'00 hores na Llibrería Paraxuga (c/ Independencia, 33).