Google dispárase na bolsa

La comunidá inversora torna otra vegada más a los parqués tres de meyores rentabilidaes y aprovechando los baxos precios de delles acciones. Anque'l petroleu ta raspiando máximos la xuba de los valores tecnolóxicos ta tirando con fuercia p'arriba peles bolses.

Les estadístiques de la selmana concentráronse nos Estaos Uníos. Asina, l'índiz de confianza de la Universidá de Michigan en 94,2 puntos cuando los economistes contaben con 96 puntos. Pero los datos que más animaron les bolses foron l'ISM manufactureru (58,5 puntos) y la xuba del gastu na construcción (+0,8%). Estos datos demuestren que la recuperanza económica na primer economía del mundu yá ta en camín. Na Zona Euru, la estadística más importante foi la de ventes al por menor d'Alemaña que medró un esperanzador 1,1%

Google, la estrella internáutica de la bolsa, ya tien una xuba dende l'OPV de más del 40% y otros valores d'Internet y del sector tecnolóxicu tan medrando asgaya como nos vieyos tiempos. En Wall Street entamó un rally con un Dow Jones nos 10.192,65 (+1,1%) y l'índiz Nasdaq nos 1.942,20 (+2,39%). Les anuncies macroeconómiques tamién ayudaron sobremanera. Nel Vieyu Continente tamién pintó perbien con xubes nes principales bolses. La Bolsa de Francfort tuvo unes xubes penriba'l 2,6%, mentanto que la de París medró un 2,4% y Llondres tuvo perbaxu'l 2%.

El volume de contratación de 3.070 millones d'euros na Bolsa de Madrid diz muncho del positivo entamu del mes d'Ochobre. Asina, l'Ibex-35 tuvo una perbona selmana con xubes del 2,38% y asitiándose nos 8.220,60 puntos. L'apueste de los inversores pola renta variable ye bien claru anque les duldes siguen ehí. Les xubes nel parqué madrilanu tocaron el 5% y tuvieron mui penriba'l 2% nel casu de Telefónica, TPI, Jazztel, Telepizza, Banesto y Arcelor. Nel terrén de les perdes destacó Amadeus, empresa que ta nun procesu de venta. L'anuncia de la selmana foi la sustitución na presidencia de la CNMV del octoxenariu Blas Calzada pol socialista Manuel Conthe. Los próximos retos del nuevu presidente son llevar a bon puertu les polítiques de bon gobiernu nes empreses y el bon desenrollu de les nueves normes contables NIC.

Munchu mieu metió'l petroleu a lo llargo de la selmana pasada con cotizaciones na raya de los 50 dólares el barril. Les males anuncies dende Iraq, los problemes nes refineríes afectaes polos furacanes del Golfu de México y los conflictos pol control del petroleu nel primer productor africanu, Nixeria, nun dieron tregua a los inversores. Al final la tranquilidá llegó y los precios del Brent tornaron a los 46 dólares barril. De toles formes, les economíes desarrollaes ven en peligru la estabilidá énte la xuba de los precios y los problemes estructurales de calter enerxéticu.

Selmana de más a menos pa la divisa europea, onde tuvo más de cuatro díes de xubes ante un dólar que nun ye quien a caltener la confianza ente los inversores de los mercaos de divises. Asina, l'euru peslló nos 1,24 dólares unidá. Nel mercáu de renta fixo los bonos tuvieron una selmana positiva . Otramiente, l'oru sigue en xuba y yá val 418,5 dólares la onza.