Entregu F.C. 24, Entrego F.C. 7

El equipu de fútbol de El Entregu, que xuega en primera rexonal, ye l'únicu en toa Asturies que pon el topónimu asturianu na so denominación oficial. Ello ye asina dende que se fundó l'actual equipu va ocho años, dempués de qu'otros clubes llevaren el nome de la capital de Samartín del Rei Aurelio pelos campos d'Asturies, casu del "Unión Entrego" y otros que desapaecieren por problemes económicos.

La suerte acompañó dende l'entamu al equipu nuevu, y en menos d'una década l'equipu entreguín pasó de la segunda rexonal a la primera y organizó una bona estructura de fútbol base, con más de 150 neños xugando en toles categoríes, dende benxaminos hasta cadetes, too ello col sofitu y l'aportación de más de 400 socios.


Sicasí, la denominación asturiana nun tenía'l preste de tola masa social y asina, un grupu de socios forzaron ayeri una asamblea pa intentar que se punxere una denominación en castellano "Entrego FC". Según el promotor de la iniciativa, ello valdría pa recuperar el nome de los equipos antiguos del pueblu, en cuenta del modernu "Entregu", pero la idea nun cuayó, y asina'l resultáu de la votación nun dexó dulda nenguna sobre la voluntá normalizadora de los socios del club: 24 votos al favor de siguir como Entregu contra 7 que queríen pasar a "Entrego", un resultáu que dexa la cosa n'anécdota y que caltien la denominación n'asturianu que ye la que sal na ficha oficial del club, nos sos uniformes, en tola correspondencia que manda l'equipu... y nes fueyes deportives que se reparten pelos chigres cada domingu.